«نفسي أمضي معاك العقد الجديد».. والدة زيكو تكشف عن حلم جديد لابنها

عبرت والدة مصطفى زيكو عن سعادتها بما وصل إليه نجلها، مؤكدة أن أكثر ما تتمناه هو أن يكون قريبا منها، وأن تحتضنه بعد تحقيق حلمه، مشيرة إلى أن زوجها الراحل لم يشهد هذه اللحظات التي طالما تمنياها.

أنا مش عايزة حاجة غير إنه يقرب مني

وقالت والدة مصطفى زيكو، خلال لقاء مع الإعلامية ريهام عياد: «شكرا.. الكلمة دي بس اللي أنا عايزاها من ولادي وعايزاهم يكرموا أمهم، أنا مش عايزة حاجة، أنا عايزة بس إن ابني يقرب مني، هو اللي بيسأل عليا، ولو السوشيال ميديا وقفت نص ساعة بيتصل عليا ويقول لي انتي فين، هو الدنيا كلها عندي».

وأضافت: «إخوته عارفين كده، بس الكورة وشغلهم، وأنا ما بزعلش منهم، لكن الكورة برضه من غير رضا الأم لأ».

نفسي أخده في حضني

وتابعت قائلة: «هو على طول على التليفون، ولو عوزت حاجة ما بيتأخروش، بس أنا نفسي أخده في حضني، وأقوله ده الحلم اللي إحنا كنا بنحلم بيه».

وأضافت: «والده ما شافش محمد صلاح، وما راحش معاه الماتشات، وأنا اللي تمنيت إنه يبقى محمد صلاح، وكنت على طول أقول له يا أبو مكة».

كان نفسه يتمرن جنب محمد صلاح

وكشفت والدة مصطفى زيكو عن تعلق نجلها بالنجم محمد صلاح، قائلة: «أنا كنت أتمنى بس اليوم اللي يتمرن فيه جنب كابتن محمد صلاح، واللي بيحصل إنه اتصور معاه، وبعت لنا الفيديوهات».

وأضافت: «هو كان بيهزر ويقول إن ده حلم من أحلامه، وما كانش بيسيب ماتش للمنتخب، وكان دايما يقول إنه قاعد مع محمد صلاح، ولفت الأيام واتحقق الحلم».

الحلم التاني إن شاء الله يبقى قريب

واختتمت حديثها قائلة: «عقبال الحلم التاني، إن شاء الله يبقى قريب، هو عارف الحلم التاني». وأضافت: «نفسي أحضر معاك العقد الجديد، وأمضي هنا معاك عليه».