مدبولي: "جهاز مستقبل مصر" صندوق ثروة جديد لتعظيم أصول الدولة
أكد الدكتور مصطفى مدبولي، رئيس مجلس الوزراء، أن الاتجاه العالمي حاليا يقوم على إنشاء الصناديق السيادية وصناديق الثروة بهدف تعظيم إدارة وتشغيل أصول الدول، مشيرًا إلى أن العديد من الدول الشقيقة والدول الكبرى تمتلك أكثر من صندوق سيادي.
كل الدول دلوقتي بتلجأ لصناديق سيادية
وقال مدبولي، خلال مؤتمر صحفي بمدينة العلمين الجديدة: "إن كل الدول دلوقتي بتلجأ لصناديق سيادية للدولة بهدف إنها تعظم من إدارة وتشغيل أصولها. وبدون ذكر أسماء، إحنا عارفين كويس قوي إن فيه دول شقيقة ودول عالمية كبيرة لديها بدل الصندوق الواحد اتنين وتلاتة."
وأضاف: "فبالتالي توجه الدولة المصرية: إحنا أنشأنا الصندوق السيادي، وفكرة صندوق جهاز مستقبل مصر إن احنا نعمل ما نطلق عليه صندوق ثروة آخر، وبالتالي يبقى له تخصص مختلف شوية عن الصندوق السيادي، لأنه هنا له بُعد تنموي إنه بيعمل مشروعات تنموية."
وأوضح رئيس الوزراء أن ميزة هذه الصناديق بقوانينها الخاصة أنها تتمتع بأكبر قدر من المرونة، قائلاً: "خلينا نعترف، إحنا في النهاية بنعمل تحفيز للاستثمار وكل ده كدولة، لكن ما زالت الإجراءات القانونية أو الحكومية العادية والإدارية العادية بيبقى فيها نوع من عدم المرونة الكافية."
وتابع: "بالرغم إن احنا كل محاولاتنا لتحسين مناخ الاستثمار، تظل بتقيدنا قوانين كثيرة، ودايمًا مشكلتنا في عدد من الموضوعات التنسيق ما بين جهات الدولة المختلفة."
صناديق الثروة للأجيال القادمة
وأشار مدبولي إلى أن هذا الأمر لا يقتصر على مصر فقط، موضحًا: "الموضوع ده مش عندنا لوحدنا، الدول كلها فطنت إليه، وبالتالي لجأت إلى إنشاء ما يطلق عليه الصناديق السيادية أو صناديق الثروة للأجيال القادمة، بتجمع فيها الأصول المهمة والجيدة بنظام مرن جدًا في عملية الإدارة والتشغيل والتنمية، وبالتالي تقدر إنها تسرع من عملية الاستفادة من هذه الأصول والثروات."
واختتم رئيس الوزراء تصريحاته قائلاً: "عشان كده فكرة إنشاء هذا الجهاز بهذا القانون وإعادة تنظيمه، لأن كان قبل كده بيتسأل: هو الجهاز ده كيانه إيه؟ تبعيته لمين؟ هو بيشتغل إزاي؟ النهاردة بالإجراء اللي احنا عملناه كقانون بقى واضح تمامًا: جهاز مدني خاضع لرئاسة الجمهورية، بيراقب عليه من كل الجهات اللي موجودة في الدولة، بما فيهم مجلس النواب نفسه والأجهزة الرقابية، وبالتالي بقى النهاردة هو جهاز أو صندوق ثروة لكل المصريين."
