رشا مهدي: الزعيم عادل إمام قربني منه شخصيا وعلمني أهم درس في التمثيل
قالت الفنانة رشا مهدي، إنها تشرفت بالعمل مع الزعيم عادل إمام في أكثر من عمل، مؤكدة أن تجربة الوقوف أمامه لها طابع خاص ومختلف.
رشا مهدي تكشف سر تعلمته من الزعيم عادل إمام: الممثل لازم يعرف يقول «آه» و«لا»
وأضافت «مهدي»، خلال لقائها عبر «نغم أف أم»، : «الحقيقة أنا كنت محظوظة إن أنا عملت مع الزعيم مسلسلين، والمسلسلين الحمد لله كان رد فعلهما حلو جدًا، وكانت الأدوار بتاعتي مميزة، في «العراف»، كان اسمي في المسلسل حنان، وأنا فاكرة كويس جدًا رد فعل الجمهور على المسلسل بشكل عام، المسلسل كله كان جميل جدًا، ولغاية دلوقتي، رغم إني كنت مشاركة فيه، بتفرج عليه كمتفرج وبحبه جدًا».
وتابعت: «حبيت الدور جدًا، وفي نفس الوقت قدمني للناس بشكل مختلف، فأنا حقيقي كنت محظوظة جدًا، وإن المسلسل ده كمان قربني من الزعيم بشكل شخصي، اتكلمنا كتير في تفاصيل كتيرة جدًا، وكان عنده نصائح كتيرة، ومش قادرة ألخصها في جملة واحدة، لكن أهم حاجة اتعلمتها منه إن الممثل لازم يختار، ولازم يعرف يقول إمتى آه وإمتى لا».
وواصلت: «لما تشوف التزامه وحبه للمهنة، وتشوف قد إيه بيقدم الشخصية، وإزاي بيكون قريب من الناس كممثل وكفنان كبير، تعرف إنه فعلًا عظيم، الكلام عنه محتاج وقت كبير جدًا، واختصاره في كلمة صعب، لكنه فعلًا زعيم».
وقالت الفنانة رشا مهدي، في وقت سابق، إنها لا توافق على أي عمل لمجرد التواجد على الساحة الفنية، مؤكدة أنها تعتمد في اختيار أدوارها على إحساسها واقتناعها الكامل بالشخصية والعمل، إلى جانب خبرتها ودراستها للتمثيل.
لا أعمل من أجل التواجد
وأضافت «أنا بقالي كام سنة في الشغلانة، فالناس عارفة أنا بختار إزاي، أنا بشتغل بإحساسي، ولما أحس إن الحكاية صدقتها وحبيت أكون موجودة في العمل ده بكون موجودة، غير إني دارسة وفاهمة الدنيا ماشية إزاي، فالإحساس مع الخبرة وحبي للدور وللمجموعة اللي بشتغل معاها هو اللي بيخليني أوافق، ولو ما حسيتش بده خلاص».
الموهبة والدراسة يكملان بعضهما
وأكدت أن الدراسة الأكاديمية لا تقل أهمية عن الموهبة، موضحة أن النجاح في التمثيل يحتاج إلى مزيج من الموهبة والوعي والثقافة والإدراك، وأضافت: «الدراسة بتفرق جدا، الوعي مهم قوي والثقافة والإدراك المعرفي مهمين، والموهبة والإحساس والصدق مهمين جدا، الاتنين بيكملوا بعض».
