مصطفى شوبير: توقعت تغيير ميسي لطريقته في تنفيذ ركلة الجزاء
كشف مصطفى شوبير، حارس مرمى النادي الأهلي، تفاصيل اللحظات التي سبقت تصديه لركلة جزاء نفذها النجم الأرجنتيني ليونيل ميسي، مؤكدا أن التركيز والهدوء كانا مفتاح التعامل مع الموقف، وأن التفكير في اسم ميسي كان سيؤثر سلبا على أدائه.
درس ركلات الترجيح بعد مباراة أستراليا
قال مصطفى شوبير: "بعد ماتش أستراليا، إحنا لعبنا ضربات جزاء، وأنا ما صدتش ولا واحدة، لكن الحمد لله ربنا كرمنا إنهم ضيعوا اتنين بره، وصعدنا".
وأضاف: "قبل ماتش الأرجنتين قعدت أتفرج على ميسي وعلى كل الناس اللي بتشوط ضربات الجزاء، وطبعا ميسي أول واحد، وبتذاكر بيميل فين، وبيشوط إزاي، وطريقة وقفته ودخلته".
تصديت لركلة ميسي بتوفيق من ربنا
وأوضح: "هي في الأول وفي الآخر توفيق من ربنا، مش شطارة خالص. أنا صديت واحدة في ماتش إيران، وفي أستراليا ما صدتش ولا واحدة، وبعدها صديت بتاعة ميسي، فدايما فيها توفيق".
وأضاف: "طبعا دراسة اللاعب بتفرق، طريقة وقفته، والدخلة بتاعته، كل الحاجات دي بتفرق جدا".
كيف قرأ طريقة تنفيذ ميسي؟
وتابع شوبير: "ميسي متعود يدخل بالراحة ويستنى الحارس يروح ناحية، ويحطها عكس اتجاهه، لكنه ما عملش كده، لأنه كان مضيع اللي قبلها بنفس الطريقة".
وأضاف: "كنت بسأل نفسي لو جات له ضربة جزاء، هيقف ولا هيغير الدخلة؟ ولما حط الكرة ورجع خطوة ودخل بالطريقة دي، حسيت إنه هيشوط على الشمال".
وأوضح: "ما كانش ينفع أتحرك بدري، لأنه لو شافني هغير اتجاهه، فاستنيت لآخر لحظة، والحمد لله ربنا وفقني".
لو فكرت إنه ميسي كنت هخسر
وعن حالته الذهنية قبل التنفيذ، قال: "لو قعدت أفكر إنه ميسي، وإن ده أحسن لاعب في التاريخ، ده كان هياخد مني كتير جدا".
وأضاف: "المهم إنك تركز في الحدث نفسه، مش في اسم اللاعب".
وأشار إلى أنه لا يعتمد فقط على التوقع، قائلا: "فيه ناس بتختار يمين أو شمال وخلاص، لكن أنا لما شفت دخلة ميسي حسيت إنه جاي الناحية دي، ومع ذلك استنيت لآخر لحظة".
هدف ميسي ما زال يؤلمه
وتحدث مصطفى شوبير عن هدف ميسي خلال المباراة، قائلا: "لغاية دلوقتي لما بفتكرها ببقى متضايق".
وأوضح: "ميسي شاط الكرة، وكان رومي لسه طالع يعمل بلوك، فما كانش عندي رؤية كاملة، ولما الكرة ظهرت أخدت فرعيتها وطلعت، وجات في إيدي، قلت هتيجي وهطلعها، لكنها خبطت في العارضة ودخلت الجون".
أعيد مشاهدة كل مباراة
وأكد شوبير أنه يراجع أداءه بعد كل مباراة، قائلا: "أنا بحب بعد كل ماتش أتفرج عليه تاني، وأشوف إيه اللي عملته كويس، وإيه اللي كنت أقدر أعمله أحسن".
وأضاف: "الماتش كله لسه ما اتفرجتش عليه، لكن شفت بعض اللقطات، وحسيت إني مش مرتاح".
وتابع: "حتى لو الجول مستحيل، أنا بحب أحاسب نفسي وأقول كان فيه حاجة ممكن أعملها؟ لأن الحارس لازم يساعد فريقه ويصد الكرات الصعبة".
