سماح أنور: "الليلة الموعودة" أول أفلامي.. واشتغلت مع فريد شوقي وأحمد زكي

تحدثت الفنانة سماح أنور عن بداياتها الفنية، مؤكدة أن أولى خطواتها الحقيقية في السينما كانت من خلال فيلم "الليلة الموعودة"، بعد مشاركات سابقة في المسرح والدراما التلفزيونية، مشيرة إلى أنها تشرفت بالعمل مع كبار نجوم الفن.

أولى خطواتها الفنية

وقالت سماح أنور: "اتعاملت مع ماما كريمة واشتغلت مع بابا. عملت معاه سهرة في استوديو 10، كنت أنا وفؤاد المهندس. السهرة دي كانت عن واحد كاتب أو رسام، قاعد في بيت في الصحرا في، وبتخبط عليه بنت صغيرة بالليل ومجنونة. صورناها في أسبوع في استوديو 10، ست أيام بالضبط".

وأضافت: “بعدها عملت مع ماما كريمة فيلم "الليلة الموعودة"، وده أول فيلم مثلته في حياتي بجد، وأول مرة أقف قدام كاميرا السينما.. قبلها كنت عملت مسرح، وعملت دراما مع الأستاذ مدبولي، وكان معايا وحيد سيف، وقدمنا مسرحيات كتير في التلفزيون.. وكمان كنت شاركت في أعمال زي “الحرام ليك” و"أخو البنات"، يعني كنت عملت شوية حاجات درامية".

العمل مع عمالقة الفن

وتابعت: "الأستاذ يحيى العالمي كان شافني في أخو البنات، وكلمني وقال لي في فيلم الليلة الموعودة وعايزينك فيه. كان أول دوري صغير جدا، لكن اتعاملت مع نجوم كبار جدا، فريد شوقي، وأحمد زكي، وماما كريمة مختار، يعني كاست تقيل جدا".

وأضافت: "الفيلم عظيم، وتأليف محسن زايد، ولغاية النهارده بجد يجنن. قصته عن الراجل اللي بيضحك على الست وبياخد فلوسها، وتحصل مشاكل بينها وبين ابنها. شوفوا مدام كريمة كانت عاملة الدور إزاي، وفريد شوقي كان عامل إيه. بجد الفيلم ده من أحلى الأفلام".

تأثرت بدوري في سعاد أم نرجس

وعن أحدث أعمالها، أعربت سماح أنور عن تأثرها الشديد بدورها في حكاية "نرجس" من مسلسل "سعاد أم نرجس"، مؤكدة أن هناك مشاهد تركت أثرا كبيرا بداخلها.

وقالت: "في رمضان ده قدمت سعاد أم نرجس.. حكاية نرجس، وكان في مشاهد كتير عجبتني، لكن أكتر مشهد أثر فيا هو المشهد الأخير، لما حضنتها وقلت لها: ما تيجي خدي حضن.. لأنها كانت مفتقدة حضن أمها، والمشهد ده كان فظيع أصلا، ومؤثر جدا من الناحية الدرامية".