مديحة حمدي: الوفاء للأسرة لا يقدر بثمن.. واخترت البيت على حساب السينما

كشفت الفنانة مديحة حمدي عن العديد من الجوانب الخاصة في حياتها الشخصية والفنية، مؤكدة أن الأسرة كانت دائما في مقدمة أولوياتها، وهو ما دفعها إلى التضحية بجزء كبير من مشوارها السينمائي، وذلك خلال استضافتها في برنامج "ورقة بيضا".

يومي يشبه أي ست مصرية

قالت مديحة حمدي، إن يومها يبدأ مبكرا، موضحة: «أنا أشبه أي ست مصرية في بيتها، بنام بدري، وما يجيش عليا الساعة 12 إلا وأنا صاحية، وبقوم بدري جدا، وأحيانا من بعد صلاة الفجر».

وأضافت: «أول حاجة أعملها لو مش صايمة أشرب شاي بلبن عشان أعرف أفتح عيني وصوتي يطلع كويس، ووجباتي ضئيلة جدا، ممكن على الساعة واحدة آخد ساندوتش بسيط، والغدا الساعة 4 أو 5 زي كل البيوت المصرية دلوقتي».

لا أحب الطبخ

وتحدثت عن علاقتها بالمطبخ قائلة إنها لا تجيد الطهي، مضيفة: «أنا مليش في المطبخ خالص، أخش أروقه وأنظفه وأزينه وأحط ديكورات على التلاجة وأسلمك المطبخ زي الكتالوج وأطلع، لكن الطبخ والأكل لا، أنا باكل عشان أعيش، مش أكيلة».

وأكدت أنها تهتم كثيرا بترتيب منزلها، قائلة: «أنا ست بيت بيتوتية جدا، بحب التلميع وتلميع الزجاج والترابيزات، وبيتي لازم يبقى زي الكتالوج، وساعات ييجوا يصوروا عندي يقولولي إحنا حاسين إننا في متحف مديحة حمدي مش بيت مديحة حمدي».

وأضافت أنها استفادت كثيرا من زوجة ابنها، موضحة: «اتعلمت من مرات ابني كتير، هي مغرمة بإكسسوار البيت وبتفهم في الملابس والإكسسوار الحريمي أكتر مني، وبناخد من بعض، والأجيال بتسلم بعض».

اخترت البيت على حساب السينما

وأكدت مديحة حمدي أنها حسمت أولوياتها منذ بداية حياتها الزوجية، قائلة: «من أيام الخطوبة وأنا ملزمة إني هبقى زوجة ثم أم ثم جدة، وزوجي الله يرحمه كان دايما يأهلني لكده، وكان يقولي: مش معقول بروفات في المسرح القومي الساعة 11، وبعدها استوديو لمسلسل، وبعدها مسامع إذاعة، أنا فين؟ وولادنا فين؟».

وأضافت أنها استجابت لرغبته، قائلة: «قلت له مش هشتغل سينما، وعملت 10 أفلام بس، يا يطلع فيلم تجاري قوي ويترفض من النقاد والمثقفين، يا يبقى فيلم عالي جدا زي "طوق السيد البلطي" بتاع الأستاذ صلاح مرسي».

وأرجعت محدودية أعمالها السينمائية أيضا إلى طبيعة بداياتها الفنية، قائلة: «إحنا كلنا في الأول بنتصاب بمرض وقتي اسمه نجومية، وأنا دخلت على بطولة على طول، من أول "السكرتير الفني"، وبعدها في التلفزيون "طائر الشمس" بطلة، والقدر كان دايما جنبي، فمفيش حاجة ضايقتني».

وشددت على أن الوفاء للأسرة لا يقدر بثمن، مشيرة إلى أنها لا تشعر بالندم على اختياراتها، لأنها كانت تؤمن دائما بأن نجاح الإنسان الحقيقي يبدأ من بيته قبل أي نجاح آخر.