مبروك للمنتخب.. زوجة حسام حسن تعلق على التريند: «ما لوش غيري وأنا ما ليش غيره»
أعربت دان أدم زوجة الكابتن حسام حسن عن دعمها الكامل له، وتحدثت في تصريحات خاصة لـ«نيوز رووم»، عن أداء لاعبي المنتخب أمام أستراليا، ورسائلها للاعبين والجهاز الفني، إضافة إلى تعليقها على التريند المتداول مؤخرًا وجاء الحوار التالي:
س/ إيه رسالتك لكابتن حسام حسن؟
- ربنا معاه ويوفقه ويفرحنا ويفرّح المصريين كلهم كالعادة يا رب، وإن شاء الله بإذن الله نفضل على طول كده سبب في فرحة كل المصريين يا رب إن شاء الله.
س/ رأيك في أداء اللاعيبة أمام أستراليا النهاردة؟
- اللاعيبة كلهم رجالة وقدّها، ولعبوا باستبسال وحاربوا على الفوز، ربنا يفرّحهم ويوفقهم عشان خاطر المصريين، بصراحة يستاهلوا الفرحة وهما رجالة وقدروا إن كل المصريين يستاهلوا الفرحة.
س/ إزاي حضرتك بتدعمي كابتن حسام وسط ضغط المباريات؟
- بدعم جوزي طبعًا، وطول الوقت أنا في ضهره ومعاه وهو يستاهل، هو يستاهل الفرحة دي وحارب عليها 11 سنة، ويمكن يكون أكتر كمان وهو يستاهلها.
س/ إيه رأيك في “التريند” اللي طالع: "أنت ليك غيري يا حسام ده"؟
- آه، وطبعًا ما لوش غيري، ربنا يخليه، وأنا ما ليش غيره، والعيال ما لهمش غيرنا، وربنا يخليه لينا ويخليه للمصريين كلهم يعني، المصريين كلهم ما لهمش غير حسام.
