«قدموا أرواحهم عشان ينقذوا غيرهم».. أحمد موسى ينعي شهداء حريق منشأة ناصر
قال الإعلامي أحمد موسى إن قيادات وزارة الداخلية كانت موجودة على الأرض للإشراف المباشر على عمليات الإنقاذ، مؤكدا أنهم كانوا في مقدمة الصفوف لمتابعة الموقف وحماية أرواح المواطنين.
وأضاف: «كان على الأرض عشان يتواجد ويشرف ويتابع، عايزين نحمي أرواح الناس، نحمي مين؟ أهلينا. فكان موجود، زي ما حضراتكم شفتوا في الموقع، بنفسه يقود ويتقدم الصفوف، مش قاعد في مكتب، يقود بنفسه ويتقدم الصفوف مع الزملاء من الضباط والجنود، ويوجه ويقول: اعملوا كذا».
وتابع: «هذه قيادة كبيرة في وزارة الداخلية.. تخيلوا القيادة الكبيرة دي بتعمل كل ده عشان تنقذ أرواح الناس، خايف عليهم، واستشهد، واستشهد معاه اتنين كمان.. ودول هما ولاد مصر ورجالة مصر».
ملحمة وطنية حقيقية
وأكد أن ما جرى يمثل «ملحمة وطنية حقيقية» قدمها رجال وزارة الداخلية ورجال الشرطة، مشيرا إلى أن الأداء كان على أعلى مستوى.
وقال: «دول شهداء قدام حضراتكم. العمل اللي عملوه إنهم حموا الناس وضحوا من أجل الناس، قدموا أرواحهم. كل واحد فيهم قدم روحه عشان يحمي أهلينا في منشأة ناصر. هذا جزء من التضحيات، ولكن تضحيات إحنا شايفينها قدامنا، شهداء الواجب، شهداء مصر، شهداء البلد».
واختتم بالدعاء لهم قائلا: «ربنا يرحمهم ويحسن إليهم، وخالص التعازي لكل أحبابهم في كل مكان».
كما أشاد برجال الحماية المدنية، قائلا: «رجال الحماية المدنية اللي بيشتغلوا على مدار الوقت، لما يبقى فيه حريق، على طول بتقولهم: الحقوني، فيلحقك، وهو جاي ما يعرفش هيرجع بيته ولا لأ».
وأضاف: «اللواء الدكتور محمد الشربيني عنده ابن، تقريبا، بيمتحن الثانوية العامة. كنت بعزي الأستاذ أسامة سرايا النهارده، فقال لي: أقولك إيه؟ أهو ده جزء من العمل.. اللي عنده ابن بيمتحن الثانوية العامة، ساب بيته وساب ولاده، وراح يعمل إيه؟ دوره إيه؟ دوره إنقاذ الناس، حماية أرواح الناس».
وأكد موسى: «هذه مسؤولية عظيمة، ومن المهم بالنسبة لنا نبقى شايفين حجم العمل اللي بيتم، وحجم الجهد، وحجم التضحيات التي تقدم من جانب وزارة الداخلية ورجال الشرطة في كل وقت. بنترحم عليهم، اللهم ارحمهم».
