خالد عباس: جهزنا "الفان زون" بأعلى مستوى لاستقبال الجماهير بدور الـ 32
قال المهندس خالد عباس، رئيس مجلس الإدارة والعضو المنتدب لشركة العاصمة الإدارية للتنمية العمرانية، إن فوز المنتخب المصري في كأس العالم صنع حالة كبيرة من الفرحة بين الجماهير، موضحا أن هذا الفوز كان حدثا تاريخيا لم تعشه الجماهير المصرية من قبل.
وأضاف: "إحنا بقالنا 90 سنة ما كسبناش في كأس العالم، يعني من أول كأس عالم دخلناه سنة 1934 لحد كأس العالم ده عمرنا ما كسبناش، فالناس طبعا مش مصدقة إن إحنا كسبنا ماتش في كأس عالم، ومش ماتش بس، ده ماتش هيدخلنا الدور اللي بعده، وعمرها ما حصلت برضه في تاريخ مصر، فالناس كانت في حالة فرحة كبيرة، وإنت عارفة الشباب لما بيتجمعوا مع بعض، واحد يبدأ بحاجة، فتلاقي الباقي كله اندمج معاه، وابتدوا يسخنوا على بعض".
وأضاف رئيس مجلس الإدارة والعضو المنتدب لشركة العاصمة الإدارية للتنمية العمرانية، خلال لقائه ببرنامج «صاحية السعادة» المذاع عبر فضائية «dmc»، أن فرق العمل كانت تعمل يوميا طوال فترة إقامة الفان زون، قائلا: "إحنا شغالين طول فترة الفان زون، شغالين كل يوم، خصوصا في أيام ماتشات مصر، لأن المكان بعد كل فعالية لازم يرجع تاني لحالته الطبيعية، وده بياخد وقت ومجهود كبير من ناس كتيرة جدا".
وأوضح عباس أن الهدف من إقامة الفان زون كان تقديم تجربة مشاهدة مختلفة عن المعتاد، قائلا: "إحنا كان أملنا إن الفان زون تبقى تجربة مشاهدة مختلفة، لأن الفان زون في العالم بيبقى عبارة عن مساحة فاضية وشاشة، وبالكتير قوي يبقى فيه بعض المأكولات، وهي دي الفكرة. إحنا قلنا لا، الناس تيجي تتبسط وتقعد مرتاحة، بدل ما تقعد على الأرض جبنا البين باجز علشان الناس تقعد مرتاحة وتتفرج، فكنا بنحاول نعمل تجربة مختلفة، ويمكن ده كان سبب رد فعل الناس".
وتابع خالد عباس أن الحفاظ على المكان مسؤولية الجميع، مضيفا: "هو سلوك أعتقد إن الناس لازم تبتدي تغيره، وتحافظ على المكان، لأنه في الآخر مكان ليهم، وكل اللي معمول ده معمول علشان هم يجوا يتبسطوا فيه، مش مكان خاص بحد، لا، هو مكان لكل الناس".
وأكد أن الشركة كانت تتدخل فور انتهاء الفعاليات لإعادة تجهيز الموقع، قائلا: "إحنا طبعا دخلنا فرق النظافة على طول تشتغل، وجهزنا المكان تاني على أعلى مستوى، والحمد لله الناس هتشوف المكان، إن شاء الله، ابتداء من الدور ال32 بشكل مختلف، لأن كل يوم بنتعلم، وكل يوم بنشوف الجديد، وبنحاول نقدم تجربة جديدة وأفضل للناس".
