مؤمن نور: اسمي الحقيقي «أبو شعلة».. ومحمود حميدة اختارلي اسم الشهرة

تحدث الفنان مؤمن نور عن حقيقة تغيير اسمه، قائلا: «اسمي الحقيقي مؤمن محمد جابر محمد موسى أبو شعلة، بس أنا كنت بعمل فيلم ملك وكتابة في 2006  كنت طالب في المعهد عند أستاذ محمود حميدة».

عدم تفضيل الظهور كثيرا                                                                        

وأضاف خلال حواره عبر «نغم إف إم»: «أنا خجول مبحبش الظهور كتير، هو مش خجل بس بحب أطلع اتكلم لما يبقى في حاجة، بس مش كل ما أعمل مسلسل أطلع أتكلم».

مشاهد فيلم ملك وكتابة

وتابع: «بين مشاهد فيلم ملك وكتابة، إحنا واقفين طبعا طلاب وهو واقف فابتدى يتكلم معانا كلنا يعني كل الطلاب اللي كانت عنده ساعتها في المعهد، فبيقولي أنت اسمك إيه؟ قولتله اسمي مؤمن محمد جابر،  قالي ياه، كل ده اسم، ورصيته كمان مؤمن محمد جابر محمد وبكمل». 

سبب اختيار اسم مؤمن نور

وواصل: «قال لي لا أنت ده مش اسم يعني خلي اسمك بسيط كده مثلا مؤمن نور، وده هو ده الحوار كله اللي دار ما بيني وبين أستاذ محمود حميدة، وابتدى يكمل مع بقية الطلاب اللي واقفين».

قصة ملء الاستمارة

وأكمل: «وأنا بعمل كارنيه النقابة بعديها بسنين كثيرة جدا فبملى الاستمارة بتاعة النقابة فلقيت مكتوب الاسم واسم الشهرة فجه في دماغي على طول افتكرت الموقف اللي حصل معايا في فيلم ملك وكتابة ده، كان أول حاجة كنت أعملها أصلا في حياتي».

وتحدث الفنان مؤمن نور عن حقيقة ارتباطه ومواصفات فتاة أحلامه، قائلا: «أنا دلوقتي مش مرتبط بس أنا نفسي يبقى حد فاهمني ويبقى طيب وحنين وتعدي الدنيا ومتقفش على الواحدة ومتنرفزنيش وفيها من صفات والدتي عشان بحبها أوي وماشي بدعواتها».

قصة تسجيل عيد ميلاده                                                         

وأضاف خلال حواره عبر «نغم إف إم»: «مريت بقصص كتير قبل كده بس مكملتش عشان متفقناش».

وتابع: «أنا مولود 20 يونيو ومتسجل 9 يوليو لأن بابا كان مسافر وفضلوا سابوني شوية لحد ما يرجع ويسجلني بس أنا بحب أحتفل بعيد ميلادي في اليوم اللي اتولدت فيه، وأنا برج الجوزاء». 

ويتميز مواليد برج الجوزاء بشخصية اجتماعية مرحة وقدرة كبيرة على التواصل مع الآخرين، كما أنهم يعشقون التغيير والتجديد ويبحثون دائمًا عن التجارب الجديدة التي تضيف إلى حياتهم مزيدًا من الإثارة والمعرفة.