“عايشين على البلاط”.. أسرة بالشروق تشتكي استمرار النزاع على منزلها
تروي أسرة تقيم بمدينة الشروق تفاصيل أزمة ممتدة تتعلق بمنزل سكني تحول إلى محور خلافات أسرية وقانونية معقدة، أدت إلى فقدان الاستقرار السكني وتبادل إجراءات قضائية بين أطراف النزاع.
وبحسب رواية “مي”، إحدى أفراد الأسرة، فإن المنزل محل النزاع كان قد تم تشييده على أرض اشترتها والدتها عام 2006، وكانت جميع التراخيص والأوراق الرسمية في البداية بإسم والدتها ، قبل أن يتم لاحقًا التنازل عن الملكية لولادها.
واشارات إلى أن:"والدها كان شغال في السعودية ونزل 2014 واتهم والدتي في محضر رسمي بالسرقة لكن والدتي خرجت براءة من سراي النيابة ، ودي كانت مشكلة لوالدي لأنه كان عايز يدينها بأي حاجة عشان يبرر أفعالة ويدي لنفسه الحق إنه عايز يرمينا في الشارع وبيحاول يشوه صورتنا كلنا انا وماما واخواتي البنات .
تابعت :"كنا عايشين عادي لحد يوم 30\5\2026 روحنا فرح أختي الصغيرة وكان المفروض والدي يحضر كتب الكتاب لكنه مجاش، جالنا تليفون وإحنا في القاعة إن والدي جايب بلطجية وبيهد البيت ، سيبت القاعة وروحت القسم فضلت هناك لحد الساعة 12 بالليل .
وأضافت :"علي ما خرجت من القسم لقيت عفش البيت كله اترمي في الشارع ، وجهازي اتسرق وحاجات كتير اتاخدت من البيت، ولقينا والدي بيسلم البيت لحد إحنا منعرفوش أصلاً، المدعي بالشراء بيستند علي عقد بيع وإنه مسجله في الشهر العقاري ، المدعي بالشراء رافع علي والدتي قضية نصب وواخد عليها حكم سنة علي بيت هو بتاعها أصلاً وغلطتها انها وثقت في زوجها وعملتله تنازل في الجهاز".
وأوضحت :"قعدت في الشارع أنا وماما وأخواتي لحد يوم 19\6\2026 لحد ما استلمنا قرار التمكين ورجعنا البيت لأن إحنا مالناش مكان تاني نروحه ، إحنا مالناش غير بيتنا ده ، بعد ما استلمنا قرار التمكين ب 10 أيام المدعي بالشراء جاب ناس اتهجموا علينا الساعة 5 ونصف الفجر وإحنا بنات لوحدنا وسرقوا باب البيت، وبقالنا سنة و٣ شهور منعرفش والدي فين ومفيش تواصل من يوم 30\5\2026".
أكملت :"إحنا قاعدين علي الوضع ده علي البلاط بقالنا سنة و 3 شهور حتي الحمام بنروح أي كافيه لانه كسر البيت كله ومينفعش أسيب البيت لاني لو طلعت برة البيت وهما دخلو خلاص مش هعرف ادخل تاني ، انا خلاص تعبت انا قاعدة في مكان غير آمن وغير آدمي، انا جهازي راح وحياتي اتدمرت وفسخت خطوبتي وسيبت شغلي ومحبوسة هنا لغاية ما اوصل لحقي".
