سحر رامي: لم أختفي ولم أفكر يوما في الاعتزال.. وقلة الأعمال ليست بيدي
قالت الفنانة سحر رامي إنها لم تختف عن الساحة الفنية كما يعتقد البعض، مؤكدة أنها لم تتخذ في أي وقت قرارا بالابتعاد أو الاعتزال، معلقة: «بص أنا ما اختفيتش زي ما الناس فاكرة، وما قررتش إني أختفي أو أعتزل أو أبطل شوية، وعمري ما فكرت في كده، لكن هو الشغل المتباعد أو القليل على فترات، والواحد بيكبر طبعا وشكله بيتغير، يعني من دور لدور شكله بيتغير، ومش باستمرار على الشاشة، وده مش بإيدينا».
الميديا بتنسى.. وناس كتير بتمر بنفس التجربة
وتابعت سحر رامي، خلال لقاء في برنامج «آخر النهار»، المذاع عبر قناة النهار،: «مش أنا لوحدي الي شكله اتغير لا دي ناس كتير من ضمنهم علا أختي زيي، وناس كتير جدا رجالة وستات، بيعدي عليهم فترة طويلة، ومبيبقاش في أسباب غير إن الميديا ممكن تنساهم، وحاجات جديدة بتطلع، فيشوفوا الجديد وينسوا شوية القديم، ومش عايزين يتعبوا ويفكروا، يعني في أسباب كتير جدا، لكن الاختفاء والرجوع والحاجات دي، أنا عمري ما بطلت، وعمري ما كان عندي قرار إني خلاص».
بشتغل أول ما يجيلي دور كويس
وأوضحت سحر رامي أنها مستمرة في عملها طوال الوقت، قائلة: «كل جزء من حياتي، الحاجات اللي أنا بعملها، بعملها باستمرارية، بشتغل ممثلة، ولما بيجيلي شغل كويس بشتغل، إنما الشغل القليل مش بإيدي، ومقدرش أعلق عليه».
لو مفيش شغل كنت بشتغل مسرح
وأضافت سحر رامي: «بحاول بقدر الإمكان وعشان كده بقولك أنا عمري ما بطلت، ولو مفيش شغل كنت بشتغل مسرح، وتاني يوم الصبح يبقى في مسلسل أو فيلم، ونسافر ونرجع، والهارتكة دي بتهدى شوية، لكن أنا الحاجات اللي بعملها بعملها بشكل أو بآخر، يمكن أقل، لكن أنا بحب أفضل موجودة».
أنا عايشة بلرينا الحقيقة
واختتمت سحر رامي حديثها قائلة: «يمكن الناس فاهمة البالرينا إنها الرفيعة الرشيقة وبس، لكن مفهومي أنا للباليه إن أقدر لسه أرقص وألبس لبس الباليه، وده عايز مجهود جبار أنا عايشة بلرينا الحقيقة وكل حاجة بعملها واتجوزت وخلفت وبقيت ماما، وبقيت ممثلة وكبرت، ولسه مستمرة».
