ياسمين عز للزوجات: عايزة تفرحي جوزك خدي إسدالك ولمي عزالك وعيالك وروحي لأهلك

وجهت الإعلامية ياسمين عز مجموعه من النصائح للزوجات المصريات من أجل مباراة مصر وإيران غدا في كأس العالم، قائلة: «هتلاقوا أجوازاتكم كلكم بتتفرج عليه فنصايحي ليكي أولا عايزة تفرحي جوزك فرحة العمر قبل الفجر خدي إسدالك ولمي عزالك ولمي عيالك سلاحف النينجا وروحي عند أهلك سيبيله البيت يتفرج براحته». 

وأضافت، خلال تقديمها برنامج «كلام الناس» المذاع على قناة إم بي سي مصر، «لو عملتي اللي بقولك عليه أقسملك هيتبسط وهيدعيلك وهيفضل شايلهالك العمر كله أكتر من الشبكة اللي بعتيها عشانه مش بعيد ترجعي تلاقيه متجوز». 

نصايح ياسمين عز للزوجات أثناء ماتش المنتخب في كأس العالم غدا 

وتابعت: «أصلا بهزر معاكي جوزك ممعهوش فلوس يتجوز أصلا أخره يتفرج على ماتش أما ثانيا لو عايزة جوزك يقعد جمبك ويتفرج على الماتش وماينزلش الفجرية ادفعيله الاشتراك بيعي غويشة ولا اتنين من دهبك ولا بيعي دبلتك لو لسه موجودة أو بيعي حلقك الحمصه عشان تعمليله الاشتراك يقعد جمبك يتفرج تتونسي بيه ويتونس بيكي وأهو يلاقي حد يفش غله فيه لو المنتخب خسر لا قدر الله فالك في وشك». 

وأوضحت: «ثالثا، لما الماتش يبقى الفجر انتي بتصحي من قبلها بساعتين في المطبخ تحضري التسالي والتحالي وتعبي الترمس أو إبريق الشاي والمكسرات والجوز واللوز وكتري من اللوز لو معندكيش لوز فهو قاعد جمبك مصدر شجرة اللوز الحلو المر ومتناميش عندنا شغل وعندنا كاس عالم قومي ورينا همتك». 

واستكملت قائلة: «رابعا: لو قومتي الفجر يا مدام وملقتيش جوزك جمبك ودورتي عليه في البيت وملقتيهوش متقلقيش جوزك مش بيخونك لا هو نزل يتفرج على ماتش مصر في كأس العالم وهتلاقيه قاعد بيتفرج عليه هنا ولا هنا يعني جوزك راجل وطني زي رأفت الهجان كده المفروض تشكريه وتتنازليله عن نص ثروتك إذا أصلا إنتي معاكي في الدرج 5 جنيه». 

وفي سياق آخر، توقعت الإعلامية ياسمين عز نتيجة مباراة منتخب مصر وإيران في كأس العالم المقرر عرضه صباح غد السبت، قائلة: «أنا توقعي للماتش 2-0 للمنتخب المصري بس المهم هنلعب بخطة اي وإحنا هنلعب بخطة النساجون الشرقيون إذا كانو هما سجاد إيراني فإحنا النساجون الشرقيون المصريون».