شقيقة أمير كرارة بعد تصدرها التريند لإصابتها بالبهاق : بقالي 3 سنين
أعربت نسرين كرارة، شقيقة النجم أمير كرارة، عن تعجبها من صدارتها للتريند بعد منشورها الأخير حول إصابتها بالبهاق.
وقالت شقيقة أمير كرارة خلال فيديو لها عبر حسابها الرسمي على إنستجرام : "هرد على الناس دي كلها إزاي ؟، الموضوع كبر مني جدًا، وكنت نزلت صورة قبل ما أنام وقلت الواحد يتفك بكلمتين كده، وصحيت لقيت الدنيا مقلوبة، ليه يا جماعة الموضوع مش كبير للدرجادي ؟، وبعدين لقيت مكتوب إني مُصابة بمرض البهاق، وده مش مرض"
وتابعت : "بلاش تصعيد الأمور ده، وكمان خليتوا الواحد مكسوف، رغم إن فيه ابتلاءات أكتر من كده بكتير،
وأضافت شقيقة أمير كرارة : "كله كوم والقنوات كوم تاني، وبيكلموني علشان يعملوا معايا لقاء، بس لقاء ليه أنا مش سوبرمان ؟، ولا كنت بتسلق برج القاهرة ولميت الناس عليّ، ده غير العيادات اللي بتكلمني علشان يعالجوني ببلاش،
وواصلت نسرين : "الموضوع مش صعب للدرجادي وأنا بقالي 3 سنين كده، وكل الموضوع إني كتبت دلوقتي".
واختتمت شقيقة أمير كرارة : "خلاصة الكلام أنا بقالي 3 سنين كده، وروحت لدكاترة كتير واتعالجت، وفيه حاجات جابت نتيجة معايا ووشي راق وكل حاجة، ولو هي دي النتيجة النهائية أنا مبسوطة، وأي كلام أنا كتبته كنت أقصد أقول به إن الابتلاء اللي بيجيلنا بيلهمنا، زي ما ألهمني بحاجات كتير زي الكتابة وبكتسب خبرات، ولكن بشكر كل الناس اللي دعتلي".
وكان قد حرص النجم أمير كرارة على دعم شقيقته نسرين، بعدما تحدثت عن مرضها وأكدت أنها قررت التعايش معه دون محاربته، وأشارت إلى أنها بدأت في الاقتناع والرضا بعد فترة كبيرة من المعاناة والضعف في التغلب على هذه المحنة ، مؤكدة أنها بدأت تحب هذا الابتلاء.
وكتبت نسرين كرارة وقتها عبر إنستجرام : “بطلت أقاوم ، تعاملت مع ابتلائي كأنه شخص، حاولت معاه مرة واتنين وأكتر، فشلت ويأست وجربت أتعود وأقتنع وأصبر، وبرضه كنت برجع أضعف ودورت على أي نقطة قوة جوايا وملاقتش، لحد ما في يوم قررت ماحاربوش قررت أحبه وأختاره وأستفيد منه زي ما اتملك جزء كبير مني”.
وأضافت : “بدأت أفهم إن كل اللي ظاهر على جلدي كان بيكلمني وبيعلمني كأنه بيحكي عن كل اللي شفته من أول ما جيت الدنيا ، كل بقعة كانت بتكبر، وكأنها بتتكلم بالنيابة عني، وبتقول كل حاجة مقدرتش أقولها ، لحد ما حبيت ابتلائي ومبقتش عايزاه يمشي وساعتها عرفت إنه عمره ما كان اسمه ابتلاء كان اسمه نجاة”.
ونال المنشور إعجاب وتفاعل العديد من المتابعين الذين حرصوا على دعمها برسائل تتسم بالحب والمودة والدعم وكان من أبرز التعليقات هو تعليق شقيقها النجم أمير كرارة الذي أكد على جمال وحلاوة شقيقته ، حيث كتب : “هو انتي فيه في حلاوتك”.
