عايدة رياض: الوحدة أصعب حاجة في حياتي.. وندمانة على عدم الإنجاب

اعترفت الفنانة عايدة رياض بأن شعور الوحدة هو أصعب ما مرت به في حياتها، مؤكدة أن العمل هو الملاذ الوحيد الذي يهون عليها هذا الشعور، وقالت: "الحاجة الوحيدة اللي بتهون عليا بجد هو الشغل، من غير شغل الحياة مش حلوة حقيقي بجد".

وعن عدم إنجابها، أعربت عن حزنها العميق: "كنت أتمنى يكون عندي ولد أو بنت، أيا كان.. سعيد عمالين يقولوا ولا ولد بينفع ولا بنت بتنفع، لكن برده ونس، وده الحب الحقيقي اللي بجد، دي غريزة ربانية".

وكشفت أنها كانت تعاني من مشكلة في الإنجاب أثناء زواجها من محرم فؤاد، لكنه كان يرفض الذهاب للطبيب: "كنت بروح لدكاترة وكانوا دايما يقولوا لي خلي محرم يجي، ومحرم ما كانش بيرضى يروح، كان يقول لي أنا مخلف، مع إنه مكانش عنده 30 سنة". وأضافت: "مكنتش حاسة بالأمان، ودايما في توتر، كنت خايفة من المستقبل".

لو كنت خلفت كان ممكن أتنازل عن شغلي وأقعد

أوضحت عايدة رياض أن فراغها بعد الطلاق هو الذي دفعها للعودة بقوة إلى الفن، مؤكدة أنها لو كانت أنجبت أطفالا، ربما كانت ستتنازل عن التمثيل. وقالت: "لو كنت خلفت، يمكن كنت قعدت، عشان الفراغ اللي كان موجود.. لكن ماخلفتش وبعدت عن أي حاجة بحبها، الفرقة والتمثيل، حياتي كلها".

وأضافت: "لو رجع بيا الزمن، هختار نفس الطريق، قرار الصح 100%، مش ندمانة عليه خالص". وعن رفضها الزواج مرة أخرى، قالت: "كل اللي قابلتهم كانوا عايزين يقعدوني وما يخلونيش أشتغل، وأنا كنت عايزة أرجع للشغل اللي بحبه، ما كانش الجواز في بالي خالص".

حكمتها في الحياة: "اتقي شر من أحسنت إليه"

في ختام حديثها عن محطات حياتها، كشفت عايدة رياض عن حكمتها التي خرجت بها بعد مشوار طويل: **"اتقي شر من أحسنت إليه"، وقالت: "ما تحسنيش لحد ويطلع مش كويس، التقي شر من أحسنت إليه".

وعن أقرب الناس ليها، قالت: "أهلي، اختي هدى، وسمير أخويا، وأشرف". وأكدت أنها تمسكت بصفة واحدة لم تتغير فيها طوال حياتها وهي "حب الخير للناس".

خوفها من المرض.. ورفضها للعمليات التجميلية

سئلت عايدة رياض عن أكثر شيء تخاف منه، فأجابت: "الخوف من المرض، أو عذاب المرض"، وعن عمليات التجميل، قالت: "عمري ما عملت ولا حاجة، ومش هعمل، أنا مش ضد لكن لو في جفوفات جامدة ممكن، لكن حكاية النفخ والزيادة دي ماليش فيها".

وعن أكثر شيء ضايقتها في مشوارها، قالت: "مرة كنت مرتبطة بمسلسل ومضيت العقد، ولقيت واحدة تانية بتمثل الدور من غير ما يعتذروا ليا، وشركة كبيرة هي اللي عملت كده، وكنت في فترة محتاجة الفلوس عشان علاجات أخويا".