«آفة إعلامنا».. فاتن عبد المعبود تهاجم الجري وراء التريند

أجابت الإعلامية فاتن عبد المعبود على سؤال مفاده: «هل التريند حاليا بيفرض أجندته على الإعلام؟»، قائلة: «خلينا نبقى واقعيين اه بيفرض، بس كمان بيزعلني أوي إنه ساعات بيفرض نفسه وإن احنا من كتر شغفنا إن يبقى عندنا سبق فتطلعي تقولي وبعدين تكتشفي إنك كنتي غلط ودا مش صح».  

الجري وراء التريند آفة

وأضافت، خلال حوارها عبر قناة «نيوز رووم»: «هذا الموضوع يفقد المصداقية عند الناس، لإن فكرة الجري ورا التريند بقت آفة إعلامنا دلوقتي ولازم نتخلص منها». 

وعلقت الإعلامية فاتن عبد المعبود عن أزمة مستشفى الشاطبي بمحافظة الإسكندرية التي أثارت جدلا واسعا خلال الأيام القليلة الماضية، قائلة: «أنا كفاتن دايما لما حاجة بتتنشر على السوشيال ميديا مش باخدها أمر مسلم بيه لأن شوية شوية مع الوقت بتكتشفي إن في خلفيات ورا هذا الموضوع». 

تعليق على أزمة الشاطبي

وأضافت عبد المعبود، خلال حوار خاص عبر موقع «نيوز رووم»: «الموضوع خلاص أمام جهات التحقيق يعني لو في مخالفات هتظهر اللي خالف دا هياخد جزاءه، أنا أثق تماما وسط هذا العالم المفتوح اللي مبقاش في حد بيداري فيه على حاجة».

وتابعت: «خلونا دايما نفكر كويس أوي قبل ما ناخد قرار، نستنى لإني واثقة إن تحديدا في الحكاية دي هيكون في مفاجآت». 

جهود وزارة الداخلية

وحول إجابتها عن سؤال مفاده: «هل صح إن الدكتورة كانت تعرض رأيها على السوشيال ميديا وألا تتوجه لجهات مختصة»، قالت فاتن عبد المعبود: «عندنا الثقافة نفسها بقت مختلفة، أي حد دلوقتي بيصور فيديو في الشارع، لكن صفحة وزارة الداخلية شغالة 24 ساعة على كشف حقائق الفيديوهات، أنا ببقى مشفقة عليهم من كم الفيديوهات». 

السوشيال ميديا أصبحت وسيلة إبلاغ

واختتمت: «أي حد دلوقتي يروح مشير أي حاجة حصلت ويروح حاططها على صفحته وتبدأ الناس تشيرها، هي دي بقت وسيلة الإبلاغ على الرغم إن احنا بنقول يا جماعة في جهات تحقيق وأنا ضد إن السوشيال ميديا تبقى مكان للبلاغات، وكأن السوشيال ميديا بقت هي مكان المحاكمة، الناس بتتحاكم على السوشيال ميديا قبل ما تتحاكم في جهات التحقيق، الحقيقة وأصل الحكاية هنرجعلها هنرجعلها، مرت السنين بقى شوفناها مشوفناهاش أعتقد إن الظاهرة هتنتهي».