«قالب طوب بدل الأوردر».. وائل الإمام يكشف مفاجأة صادمة في طلب أونلاين
شدد الناقد الرياضي وائل الإمام على ضرورة الانتباه عند استلام الطلبات عبر الإنترنت، بعد واقعة غريبة تعرّض لها مع إحدى الشركات الشهيرة، مؤكدا أن الموقف كشف له أهمية التحقق قبل استلام أي شحنة.
وقال الإمام، في منشور عبر منصة إكس، إنه طلب منتجا عبر الإنترنت بمبلغ كبير، وعند وصول المندوب قام بتسليمه بعد إدخال كود الاستلام المخصص، إلا أنه لاحظ أثناء دخوله المنزل أن وزن الكرتونة غير طبيعي، ما دفعه للشك وإيقاف المندوب فورًا.
وأضاف: «اسمعوا الحكاية عشان الكل ياخد باله بعد كده ومتلقيش نفسك لابس ومش عارف تعمل إيه، من غير ما أقول اسم الشركة، طلبت طلب من على الإنترنت من شركة شهيرة، والطلب ده كان بمبلغ كبير، وبعد ما اشتريت الحاجة وصلت البيت والمندوب سلمها لي وطلب مني كود التسليم اللي معمول علشان بعض الأوردرات، بلغته بكود التسليم واستلمت الكرتونة منه».
وتابع: «وبعدين خدت منه الكرتونة، وأنا راجع أخش البيت حسيت وأنا ماسك الكرتونة إن الوزن بتاعها مش طبيعي، فشكيت، والموضوع فرق معايا في 10 ثواني بالكثير، ندهت عليه بسرعة وقلت له تعال ما تمشيش، وفتحت الكرتونة واتفاجئت إن الكرتونة فيها قالب طوب أيوه والله قالب طوب كبير، قلت له إيه يا ريس ده؟ قال لي والله ما أعرف، وبعد شوية حوارات وبعد ما حبسته عندي في المكان واتصالات بالتليفون مع الشركة، وبعد حوالي ساعة وإرسال صور للشركة تم إلغاء الطلب من عندهم، ومستني الفلوس ترجع لي».
واختتم: «إياك تستلم حاجة متقفلة من غير ما تفتحها قدام المندوب وتتأكد إنها نفس الحاجة اللي أنت طالبها، وتتأكد إنها جاية لك سليمة. قلة الضمير موجودة عند ناس كتير، ولولا إن الشركة محترمة ولولا إن ربنا ألهمني إن وزن الكرتونة خفيف، ولو الراجل ده كان مشي وسبني ما كنتش قدرت أرجع حاجة وكنت للأسف ضاع عليّ الأوردر ده ولبسته، خدوا بالكم».
