مصطفى يونس: الخطيب حاربني في أكل عيشي.. وأنا أحق إني أشتغل في الأهلي
أكد الكابتن مصطفى يونس، نجم النادي الأهلي ومنتخب مصر السابق، أن أزمته مع الكابتن محمود الخطيب، مشيرا إلى أنه أحق أن يعمل في النادي الأهلي.
الخطيب حاربني في أكل عيشي
وقال مصطفى يونس في لقاء تليفزيوني: «أنا زعلان من محمود الخطيب، لسا في نقاط سودة بيني وبينه وحاربني في أكل عيشي هو وحسن حمدي وأنا أحق منه إني اشتغل في النادي الأهلي».
ورد على سؤال له إن البعض يرى أن الخطيب أكثر هدوءا ويمتلك شخصية قيادية أكبر، قائلا: «لا، الخطيب شعبيته كبيرة، لكن موضوع القيادة شيء آخر.. أنا ما قبلتش الظلم، وما قبلتش الظلم طول عمري».
وتابع: «أنا أول واحد شال كأس أفريقيا سنة 1982.. لكن وقت الكلام على الإنجازات يجيبوا سيرة الخطيب».
وأضاف: «الخطيب هيبقى أيقونة، والخطيب الناس هتفتكره على طول، ودي كلمة حق وأنا بتكلم في الكرة، مش في الإدارة».
انت الأفضل ولا الخطيب؟
وعندما سئل عمن هو الأفضل إداريا، قال: «أنا ما اشتغلتش إدارة أصلا علشان حد يقارن بيني وبينه في الإدارة». وأضاف: «لو أي حد مسك النادي الأهلي، سواء رئيس أو مدرب، هيكسب بطولات، لأنك بتشتغل في أكبر كيان في أفريقيا كلها».
وتابع: «عندنا مدربين، ومن غير ذكر أسماء علشان محدش يزعل، خدوا الدوري وهم ما يعرفوش يفكوا الخط في التدريب، لكن كسبوا لأنهم بيدربوا النادي الأهلي».
وأوضح أنه أصبح أكثر تحفظا في تصريحاته مقارنة بالسابق، قائلا: «دي من أخطائي زمان، إني كنت بقول أسماء وأتكلم بصراحة زيادة عن اللزوم، لكن دلوقتي بقيت أكثر حرصا».
إحنا ما كناش بناخد الملايين
وأوضح قائلا: «إحنا ما كناش بناخد الملايين اللي بياخدوها دلوقتي، لكن عمري ما حسدت حد دي أرزاق من عند ربنا، سواء وأنا لاعب أو مدرب أو إعلامي، عمري ما بصيت لحد بياخد كام أو بياخد إيه لكن لسه فيه نقاط خلاف بيني وبين الخطيب، وفي ناس كتير دخلت على مدار السنين علشان تنهي الخلاف ده».
