أول تعليق من أحمد حسام ميدو بعد تجاوز أزمته الصحية

وجه أحمد حسام ميدو، مقدم برنامج أوضة اللبس والمدير الفني السابق للزمالك، رسالة للجماهير بعد تجاوز أزمته الصحية. 

وكان أحمد حسام ميدو تعرض لوعكة صحية، نقل على إثرها لأحد المستشفيات، أمس الثلاثاء، قبل أن يعود لمنزله عقب تعافيه. 

وقال ميدو في تصريحات لبرنامج هنا المونديال الذي يقدمه على شاشة النهار برفقة الكابتن أحمد شوبير: “بشكر كل الناس اللي سألت عليا. من أول أزمة حسين ابني وأنا متماسك ومؤمن إن ده ابتلاء من ربنا، وإن ربنا دايمًا عنده الخير”.

وأضاف: “كنت بحاول أوصل رسالة لأولادي إن الإنسان مهما كانت الظروف صعبة لازم يفضل واقف على رجله ويكمل شغله،  إمبارح كان عندي أمل كبير إن العقوبة تتخفف في جلسة الاستئناف، لكن الحمد لله قدر الله وما شاء فعل، وراضيين بحكم ربنا، وإن شاء الله حسين يطلع من الموقف ده أقوى”.

وتابع: “بعد الحكم رجعت البيت وحسيت بتعب شديد، نبضات قلبي زادت وصدري وجعني ومكنتش عارف أتنفس، فروحت المستشفى، والضغط كان 190 على 100، واتحجزت واتعمل اللازم”.

وأكمل: “الصبح عرفت إن حسين اتأثر جدًا لما عرف إني تعبان، فخرجت من المستشفى على مسؤوليتي ورجعت البيت، لكن تعبت تاني، والدكتور طلب أشعة على المخ، وللأسف ظهر إن فيه جلطة خفيفة”.

وأنهى: “حاليًا أنا في رعاية طبية كاملة في البيت، والدكاترة والممرضة موجودين معايا، وباخد الأدوية اللازمة لإذابة الجلطة. الحمد لله أنا كويس، وبطمن كل الناس، وإن شاء الله بدعائكم الأزمة تعدي على خير”.