«ربنا بيرجعني للصح».. أول تعليق من أحمد سعد بعد حلق شعره

تحدث الفنان أحمد سعد عن أسباب دفعته إلى حلاقة شعره، قائلا: «كل حاجة بتبقى نشاذ عن المجتمع انت بتحس بيها أكتر في الحب اللي بيعم على مصر كلها، مش هو دا بالظبط اللي خلاني أحلق بس ساعات كتير بيحصلي حاجات جنونية وساعات بطلع أعتزل».  

ربنا دايما بيرجعني للصح

وأضاف خلال مداخلة هاتفية مع الإعلامي تامر أمين في برنامج «آخر النهار»، المذاع على قناة «النهار»: «قبل أي حاجة بحمد ربنا على نعمه عليا في إنه بيرجعني دايما للصح، وحب الناس ليه معنى».

آلاف الكومنتات إيجابية

وتابع: «بسأل نفسي انت كل مرة لما بتعمل حاجات غلط بترجع تقول أنا آسف، لو أنا فكرت الناس هتصدقني والا لا مش هرجع كل مرة أعمل الصح، زي ما تيجي تعمل الغلط وتستغفر ربنا لو فكرت هيقبل وألا مش هيقبل فأنت مش هتستغفر». 

وواصل: «شايف آلاف الكومنتات إيجابية والناس كانت زعلانة إني عملت لوك مختلف، أنا أكيد هبقى عايز أمنع نفسي من اي حاجة المجتمع رافضها مش حكاية حرام أو حلال أد ما هي عرف وحاجات معينة المجتمع ماشي عليها وعايشين مجموعة مع بعض». 

دفعة قوية بسبب وجوده مع الماتش 

واختتم: «أنا وجودي في الماتش ومع اللاعيبة حسيت إننا حاجة واحدة وفي شكل لينا كلنا، وشكلنا عربي، مش هو النشاذ عن المجتمع هو دا اللي هيديلك إيجابيات بالعكس دا كل ما تدوب جوه المجتمع أكتر كل ما يديلك أكتر».  

ظهر الفنان أحمد سعد في أحدث إطلالة له وهو يقص شعره أمام جمهروه في مقطع فيديو، معربًا عن امتناعه عن الأشياء الغريبة، وذلك من خلال حسابه الرسمي على موقع التواصل الإجتماعي فيسبوك.

أحمد سعد يقص شعره 

حيث قال أحمد سعد موضحًا: “عايزكم تبقوا معايا في اللحظة الجاية دي، عايز أعمل حاجة مهمة جدًا وعايزكم تساعدوني عليها، أيه السبب بقى، السبب أني خلاص توبت عن اي حاجة غريبة، أي حاجة هتزعل جمهوري اللي بحبه ويقعد يقولي لالا أنت ليه عامل كده، طبعا هتقولوا هو ليه كل شوية يعمل حاجات ويرجع يعتذر، مش مهم أنتوا هتقولوا ايه، المهم اني مش هلاقي جمهوري زعلان مني في أي حاجة تاني في حياتي، أه أنا مبعملش حاجة حرام، ولكن أنا عايش وسط مجتمع، مش عايز أعمل حاجات غريبة تاني وعايز أعيش في سلام، عايز أقول لكل اللي زعل مني سامحوني للمرة العشرين ألف، بس أعمل أيه بتحبوني وبحبكم”.