طبيبة توضح حقائق صادمة في الحمل والولادة بعد أزمة مستشفى الشاطبي.. لا تتجاهليها

نشرَت الطبيبة إيمان الإمام عبر حسابها على موقع التواصل الاجتماعي فيسبوك منشورا مطولا تناولت فيه واقع الرعاية الطبية في مصر، خاصة ما يتعلق بملف الولادات واختيار الأطباء وذلك بعد أزمة مستشفى الشاطبي.

وقالت: «أكتر من 70% من الولادات اللي بتتم في مصر بتتم في المنشآت الطبية الخاصة مش الحكومية الأغلبية العظمى من السيدات في مصر بيولدوا مع أطباء هما مختارينهم وبدفعولهم من جيوبهم أو تأمينهم الخاص، لو في ممارسات غير مهنية وغير أخلاقية بتحصل في المستشفيات الجامعية ومستشفيات الصحة المجانية فمش متوقع إن أصحابها يغيروا سلوكهم وقناعاتهم وأخلاقهم كليا وهم بيشتغلوا في العيادة والمستشفى الخاصة الفخمة».

أضافت: «تصدير قضية العنف التوليدي وكأنها قضية فقر وقلة إمكانيات فقط هو تسطيح وتبسيط مخل بالقضية، فأنا هنط للحلول البسيطة اللي في أيدينا كسيدات وإحنا بنختار الأطباء اللي نستأمنهم على أجسادنا وأرواح أولادنا، وده لحد ما يبقى في حلول قانونية تشملنا وتحمينا كلنا في كل المؤسسات الطبية المصرية، ودي بعض ملاحظات أرجوكي انتبهي ليها وإنتِ بتتعاملِي مع دكتورك.. وفكري ألف مرة قبل ما تختاريه علشان تستكملي رحلة حملك وولادتك معاه».

رحلة الحمل والولادة

تابعت: «لو الدكتور ما بياخدش منك تاريخ مرضي وشخصي وعائلي كامل في أول زيارة وبيحتفظ بالمعلومات دي مسجلة عنده، الدكتور ضروري يسألك عن سنك وشغلك وولاداتك السابقة وتفاصيلها وعن صحتك العامة وأدويتك وجراحاتك السابقة وعن الأمراض الوراثية والمزمنة في عائلتك وغيرها كتير.. لو ما اهتمش يعرف كل ده ويسجله فهو غير مطلع على حالتك بشكل كاف، وهيكون أخل بجزء مهم جدا من صميم شغله، ضيق وقت الدكتور لا يمكن يبرر اختصار الجزء ده من الرعاية الطبية، لو الدكتور ما بيجاوبش أسئلتك بإجابات واضحة ومعلومات كافية وكاملة تقدري تفهميها بسهولة، ده حقك الكامل مهما كانت أسئلتك غريبة ومهما احتجتي وقت علشان تفهمي وتستوعبي».

استكملت: «وارجوكي اسألي.. اسألي ما تخافيش.. وراجعي كل كلمة واطلبي إنه يكتبلك في ورقة أي معلومة/مصطلح مش فاهماه أو شاكة فيه واتحققي منها من أي مصدر آخر، لو الدكتور بيقوم بأي فحص جسدي بدون ما يشرحلك قبلها هو رايح يعمل إيه بالظبط، ويوضحلك إيه الداعي للفحص ده، ويسيبلك مساحة ووقت قبل ما تقبلي أو ترفضي الفحص وعلى فكرة المفروض ده يحصل حتى أثناء الولادة نفسها، لو الدكتور بعد ما بيعمل لك فحص بالأشعة التلفزيونية (السونار) ما بيقدملكش تقرير مكتوب عن حالتك وحالة الجنين، لو لقيتيه بيبص بصتين في الشاشة وتقومي لا عرفتي هو شاف إيه ولا عمل إيه ده كلام فارغ ده فحص أخد من وقتك ومن فلوسك وحقك تحصلي على نتيجة موثقة، الفحص ده بيظهر معلومات أهم وأكتر بكتير من مجرد الجنين ده ولد ولا بنت، ومش كفاية يقولك بالبؤ كده كل حاجة تمام أو الوزن كذا والبيبي راسه تحت».

تابعت: «فرضًا الدكتور سافر أو تعب واحتجتي تكملي مع دكتور غيره.. هتنقلي له معلوماتك السابقة وكل تطورات الحمل إزاي؟، فرضًا كان في تفصيلة غايبة عن الدكتور واترتب عليها توابع أو مضاعفات ما، واحتجتي تثبتي اللي حصل قانونيًا.. هتعملي ده إزاي؟ وطبعًا لما هتروحي للحمل التالي هتحتاجي تنقلي للدكتور معلومات حملك السابق ده معلومات مهمة ما ينفعش تضيع، ولما دكتورك يقولك شفويًا المية قليلة أو الجنين بالعرض أو المشيمة فيها كذا وكذا، دي تفاصيل بيترتب عليها قرارات مفصلية في متابعة الحمل والولادة ما ينفعش أبدًا ما تكونش متوثقة بورق يثبتها الدكتور مش هيتكلف حاجة زيادة غير تمن الورقة».

علامات لا تتجاهليها خلال الحمل

أوضحت: «إنما الدكتور اللي جهازه رخيص ورديء أو هو نفسه مش متمكن من الفحص ومابيعرفش يطلع المعلومات المطلوبة، إنتِ في غنى عنه، لو الدكتور بيقررلك أدوية/مكملات بدون ما يوضحلك الداعي ليها، وما إذا كانت آمنة تمامًا للاستخدام أثناء الحمل ولا في خطر بدرجة ما أو أعراض جانبية متوقعة، لو الدكتور ما خصصش وقت كافي علشان يناقش معاكي خطة الولادة من بدري  يرسملك تصور عام عن مجريات يوم الولادة وأحداثه بناءً على حالتك وحالة جنينك، ويسألك علشان يعرف تفضيلاتك إنتِ شخصيًا علشان الولادة مش فين وبكام بس، لو الدكتور معندوش وقت كافي أثناء الزيارة في العيادة إنه يناقش معاكي تفاصيل واحدة من أهم وأعقد التجارب اللي هتمري بيها في حياتك، هيبقى عنده وقت يوم الولادة يدعمك نفسيًا وينتبه لطلباتك وحقوقك؟».

استكملت: « لو الدكتور معندوش سيستم للرد على استفساراتك الطارئة أو طريقة يتواصل بيها معاكي في حالات الطوارئ.. مش بتكلم عن رقم تليفون شخصي للأسئلة غير المتعجلة مثلًا، بنتكلم في تطورات مفاجئة أو خطيرة في حالتك الصحية لو الدكتور بيمنع وجود مرافق يدعمك نفسيًا أثناء الولادة الطبيعية (زوج، حد من الأهل، دولا)، ده حقك طبقًا لتوصيات منظمة الصحة العالمية لضمان ولادة آمنة وإنسانية، ولو الدكتور عنده سبب ما يمنع الحق ده ياريت يوضحه من بدري علشان تاخدي قرارك في استكمال رحلة ولادتك معاه من عدمه لو الدكتور بيقررلك الجراحة القيصرية من بدري ومن غير ما يوضح أسباب، الجراحة القيصرية عبارة عن جراحة كبرى بنضطر ليها لو ظهرت أسباب تمنع الولادة الطبيعية، والمفروض بنحدد موعدها حسب حالتك وحالة الجنين».

اختتمت: «أنا زيك، مكنتش أعرف كتير من حقوقي، بس معلش نقرأ ونسأل ونثقف أنفسنا إحنا أطراف فاعلة ونقدر نصنع قراراتنا الشخصية ونقدر نضغط لحد ما نرفع مستوى الخدمة اللي بنشتريها».