الله يسامحهم.. محمود التهامي لمنتقدي التطوير في الإنشاد: في غيركم متقبل
وجه المنشد محمود التهامي رسالة إلى جمهور والده الشيخ ياسين التهامي، موضحا أنه لا يحمل أي موقف سلبي تجاههم، قائلا إنه يفهم حالة الجدل حول التطوير في الإنشاد الديني، لكنه يرى أن الأمر طبيعي ويستحق النقاش.
التطوير في الإنشاد وتواصل الأجيال
وأضاف التهامي، خلال لقاء في برنامج “يحدث في مصر”، أنه يشعر بسعادة تجاه تطور الجمهور وتنوعه، قائلا: «أنا مبسوط بهذا التطور ومبسوط ليه؟ لأن فيه معطيات كتير، في ناس بيكلموني بيقولولي إحنا والله يا شيخ محمود مش بنسمعك بس مبسوطين إن عيالنا بتسمعك».
وتابع: «لأن أولادهم مبيسمعوش أبويا، بيسمعوني أنا، فده ضمن إن يستمر الغرس، إن عيالهم بيسمعوا فن هادف، بيسمعوا لغة عربية فصحى، بيسمعوا معاني».
وأشار إلى وجود جمهور مشترك بينه وبين والده، موضحا: «فيه ناس من جمهور مولانا الشيخ ياسين وجمهوري مشترك بيسمعني وبيسمع مولانا، هي دي ميزة عندك إنك عابر بين أجيال وبتوصل ما بين أجيال».
رد على المعترضين
وتحدث التهامي عن وجود انتقادات، قائلا: «وفيه من جمهور أبويا ناس الله يسامحها، وصلت بيهم المرحلة إنهم مش متقبلين ده، ومعنديش مشكلة فيهم، بس يا سيدي ما تتقبلوش اسكت، فيه غيرك متقبله».
شرط والده عند دخوله المجال
وكشف عن شرط والده الشيخ ياسين التهامي عند بداية دخوله المجال، قائلا: «أبويه زمان لما دخلت المجال كان ليه شرطين: أول شرط لا أشكي من حد ولا حد يشتكي مني، يعني ما أشتكيش وما حدش يشتكي مني».
وأضاف: «والشرط التاني كان إني ما أقلدش ولا أقلد، يعني ما أطلعش زيه»، وأشار إلى أن والده كان يتوقع له سقفا معينا في الأداء، قائلا: «كان شايف إني ما أطلعش زيه أوي، كمتخيل سقف معين».
تاريخ تطوير الإنشاد
وتطرق التهامي إلى تاريخ الإنشاد، موضحا أن والده كان من أوائل من طوروا هذا الفن، قائلا:
«أبويه لما طلع كان فيه الشيخ أحمد التوني والشيبيتي والنقشبندي وطبار وغيرهم».
وأضاف: «كانوا بينشدوا على آلة اسمها البازة، وبعد كده حصل تطوير كبير، وأبوي أول من أدخل الطبل والكمان والناي في الإنشاد، وده كان ساعتها تطور كبير جدا».
التطوير والسوشيال ميديا
وأشار إلى اختلاف الزمن، قائلا: «زمان مكنش فيه سوشيال ميديا، فالموضوع مكنش بيبقى بالشكل ده، إنما دلوقتي السوشيال ميديا بتكبر الجدل».
وأضاف: «يا جماعة اللي معترضين على التطوير اللي بيعمله محمود التهامي، أول من طور في الإنشاد كان الشيخ ياسين التهامي نفسه».
