تامر أمين بعد تعادل مصر مع بلجيكا: أنا جاي فرحان ولابس أبيض
علق الإعلامي تامر أمين على مباراة مصر وبلجيكا التي أقيمت أمس، مؤكدا سعادته بالأداء الذي قدمه المنتخب الوطني أمام أحد أقوى المنتخبات الأوروبية.
وقال تامر أمين، خلال تقديم برنامج «آخر النهار» المذاع على قناة «النهار»: «أنا جاي النهاردة فرحان ولابس أبيض تيمنا بالأبيض اللي إحنا كنا لابسينه امبارح وعملنا بيه المعجزات».
فخر واعتزاز بأداء منتخب مصر
وأضاف: «اللي ميفرحش وميفخرش لازم يفكر في انتماءه ويعيد النظر فيه، قولتلكم إن إحنا بقينا فرقة كبيرة، امبارح وانت بتلاعب بطل أوروبا والحظوظ والتصنيفات كلها كانت مرشحة بلجيكا للفوز، لكن منتخب مصر اتعادل مع بلجيكا».
الفضل يرجع لأصحابه
وتابع: «إحنا كمصريين خرجنا زعلانين والبلجيكي فرحان وبيقول نتيجة إيجابية وعادلة إحنا فعلا عملنا ماتش حلو».
واستكمل: «أول ما الحكم صفر كلنا بصينا لبعض وقلنا يا خسارة ضيعنا فرصتين بسبب سوء توفيق وبعض الأخطاء الصغيرة».
واختتم تامر أمين تصريحاته قائلا: «الفضل يرجع لأصحابه، إحنا بقينا هنا بسبب ربنا سبحانه وتعالى، وبعد ربنا يرجع الفضل لحسام حسن، وكلمة السر في حسام حسن».
وقد علق الإعلامي تامر أمين عن الحديث المتداول حول أداء منتخب مصر، قائلا: «من بعد مباراة منتخب مصر مع البرازيل واللي بيحبوا يصطادوا في المية العكرة اشتغلوا، وأنا مش هقول أسماء عشان بيزعلوا مني، انتوا عارفين إني مبخافش، واللي يقول يقول، الناس بتقولي بلاش يا تامر عشان متعملش سجال شخصي».
مش وقت محاسبة المنتخب
وأضاف، خلال تقديم برنامج «آخر النهار»، المذاع على قناة «النهار»: «الحقيقة في ناس بجد تضايق، لما تبقى بعض المحليين والكباتن طالعين خلال اليومين دول اللي هو المفروض نبقى ورا منتخبنا وبندعمهم وبندعيلهم وحتى لو احنا بعنينا شايفين مشاكل أو أخطاء أكيد دا مش وقت المحاسبة».
المحاسبة تأتي بعد الأداء
وتابع: «المحاسبة تيجي بعد الأداء يعني بعد النهاية مش قبل ضربة البداية، عمرك شوفت حد بيحاسب قبل الامتحان؟، الحقيقة الكلام اللي أنا سمعته على مدار اليومين اللي فاتوا من بعض المحللين المعروفين بالاسم اللي بيفضلوا الشهرة والتريند وإنه يعمل فلفل شطة على حساب أي حاجة سواء اسم بلده أو الفتنة اللي ممكن يعملها بين الأهلي والزمالك».
أرجو إن الناس متبتلعش هذا الطعم
واختتم: «همهم الوحيد إن يبقى عندهم تريند وعندي فولورز، والناس في القنوات بيجبوني ولما أعمل فيديو على السوشيال ميديا يكسر الدنيا، وأرجو إن الناس متبتلعش هذا الطعم وتنبذ هذه الأفكار والأصوات الشاذة، دا مش وقت محاسبة ولا وقت تقطيع دا وقت دعم والمحاسبة تيجي في وقتها بعد اكتمال المشوار، نقعد نشوف كسبنا اي وخسرنا اي، دا الاحترام والإعلام والانتماء للبلد».
