انفراد.. شاهد عيان يكشف تفاصيل وفاة الشاب المصري أحمد أبو الدهب بألمانيا

كشف شاهد عيان، عامل صديق للمجني عليه وآخر من تعامل معه، لموقع «نيوز رووم»، تفاصيل وفاة الشاب المصري أحمد أبو الدهب ابن إحدى القرى بمحافظة الدقهلية في ألمانيا، وذلك في ظروف غامضة.

ويحكي قائلا:" الموضوع بالتفصيل إن الشاب ده من ميت غمر وموجود بألمانيا بشكل غير قانوني وبيعمل كمشرف علي عمال البناء وفي موقع العمل كانوا الشباب بيكسروا جدار غرفة في أحد الطوابق؛ بحيث أن الجدار يقع على أرضية الغرفة فإذا بالجدار يقع على الأرضية وياخدها بسقف الدور اللي تحته ويقع علي الشاب الموجود في الغرفة اللي تحت موقع الهدم مباشرة دون علم العمال، وبناء عليه جت الكدمات والكسور وخبطة الدماغ اللي فسرتها الشرطة الألمانية على أنها علامات تعذيب، وفسرت الواقعة على أنها جريمة قتل".

ويتابع الشاهد:" أحمد أبو الدهب ده مشرف عمال اللي واخدنا الشغل ده معاه شغالين في أعمال البناء بنهد بيت في منطقة (شيدل) من فوق علشان نفرغ علشان يقع لوحده،  إحنا 4 عمال، لقينا السقف كان دايب، والضحية كان معانا فوق ونزل تحت، افتكرناه راح يشتري حاجة علشان ساعة الراحة، وقولنا نوقع السقف والحيطة ومانعرفش إن هو واقف تحت".

صوت الاستغاثة

ويكمل شاهد العيان لنيوز رووم:" نزلنا روحنا الراحة بتاعتنا لمدة ساعة، لما نزلنا لقينا حطام البيت واقع في المكان اللي بناكل فيه، قولنا نكلمه على الموبيل لقينا موبيله مش مجمع وبعتنا حد يشوفه في السوبر ماركت مكنش موجود، وبعدين لقينا صوت بيستغيث من تحت الحجارة، فضلنا نشيل في الحجارة نشوف مين لإننا شكينا إنه أحمد، شيلنا كتير لحد ما الصوت اختفى عرفنا إنه مات".

ويضيف:" لما خوفنا مشينا من المكان، كلمونا بالليل جمعونا في مكان وقالولنا أحمد الإسعاف أخدته ودخلناه المستشفى وهايروح كمان 5 أيام مصر علشان فرح أخته والدنيا كويسة اتطمنوا عليه، وماتتكلموش مع حد علشان محدش يعرف، من البلد ونبوظ الفرح، تاني يوم اتفاجئنا إن فيه أخبار إنه مات وناس لقته في الغابة".

وأضاف الشاهد:" خفنا نبلغ الشرطة والسفارة باللي حصل علشان ورقنا مش رسمي، وخفنا اننا نترحل من ألمانيا.. ندمانيين اننا سبناه تحت التراب ومشينا، لكن خفنا على أكل عشنا، ومستقبل عيالنا السبب!.