ثروت: علاقتي بأصحابي في الوسط جيدة.. ولسه محتفظ بـ5 أصدقاء من أيام الثانوية
تحدث الفنان محمد ثروت عن علاقاته الإنسانية داخل الوسط الفني وخارجه، مؤكدا أنه يؤمن بقيمة الصداقة الحقيقية وضرورة الحفاظ على الأشخاص الذين يثبتون وجودهم في حياة الإنسان على مدار السنوات.
وقال محمد ثروت خلال لقاء على بودكاست “إبن أكابر” إن هناك عددا من الفنانين تربطه بهم علاقات صداقة قوية تتجاوز حدود العمل، موضحا: "في منهم صحاب، وده طبعا اللي هم بادئين معانا من بدري".
وأضاف أن مرور سنوات طويلة على الصداقة يعد اختبارا حقيقيا للعلاقات الإنسانية، قائلا: "لو أنت عارف حد بقالك 10 سنين حافظ عليه حلو، لأنه في خلال ال10 سنين ما عملكش حاجة، وما ضركش في حاجة، ولا حتى اتخانقت منه في موقف، ولو اتخانقتوا أكيد كان موقف هايف بدليل إن أنت مكمل معاه لحد دلوقتي".
وأوضح أن الصديق الحقيقي هو من يتقبل الإنسان بعيوبه قبل مميزاته، مضيفا: "حتى عيوبه قشطة، بيتأخر كلنا بنتأخر، ما بيجيبش شيكولاتة وهو جاي بيجيب كيلو موز ناكل موز عادي، مش مشكلة".
قيمة الصداقة تظهر في المواقف المهمة
وأكد ثروت أن قيمة الصداقة تظهر في المواقف المهمة، وليس في الكلمات فقط، قائلا: "ده اللي بيقف جنبك، ده اللي تلاقيه أول واحد موجود في الفرح، وأول واحد موجود في العزا، وفي الآخر تلاقيه جنبك وقت الجد".
وأشار إلى أن بعض الأشخاص قد يبررون غيابهم عن المناسبات المهمة بأعذار مختلفة، لكنه يرى أن الاهتمام الحقيقي يظهر في الحضور والمساندة، مضيفا: "في فرق بين واحد ييجي لك وقت ما تحتاجه، وواحد يقولك معلش والله شفت الرسالة بعد الفرح ما خلص".
وكشف الفنان عن أقرب أصدقائه داخل الوسط الفني، قائلا: "في محمد إمام، وفي السقا، وفي فراج، وفي تايسون طبعا، وفي أصحابنا الكوميديانات كلهم".
وأضاف: "بيومي فؤاد، وكريم عفيفي، ومصطفى خاطر، وكل دول صحابي بجد، وأنا ببقى مبسوط وأنا معاهم فعلا جدا".
ولم تقتصر صداقات محمد ثروت على الوسط الفني فقط، حيث أكد أنه ما زال محتفظا بمجموعة من أصدقائه المقربين منذ أيام الدراسة، قائلا: "في خمسة من أصحابي لسه موجودين لغاية دلوقتي الحمد لله".
وأوضح أن ظروف الحياة قد تمنعهم من اللقاء بشكل منتظم، لكنه يشعر أن شيئا لم يتغير بينهم مهما مرت السنوات، مضيفا: "ساعات ما بنتقابلش بانتظام، بس لما بنتقابل بنحس إن إحنا لسه سايبين بعض امبارح".
