في أول حوار لها بعد أزمتها.. ناني سعد الدين: "أنا قديمة أفتكروني" |خاص
تصدرت الفنانة ناني سعد الدين تريند محركات البحث خلال الأيام السابقة وذلك بسبب منشورها الأخير التي كانت تبحث من خلاله عن عمل داخل المجال الفني، وسرعان ما تدخل الفنان كريم الحسيني وعرض عليها أن تشارك كضيفة شرف في مسلسل إذاعي جديد من إخراجه، وبالفعل إنتهت صباح أمس الجمعة من تسجيل كافة مشاهدها.
وحرص موقع نيوز رووم على أن يشارك الفنانة ناني سعد الدين فرحتها بهذا العمل، وقام بإجراء حوارًا صحفيًا معها، وإليكم نص الحوار:
_حدثينا عن سبب غضبك وانفعالك قبل المنشور الأخير؟
ج: أنا بدور على حقي وزعلانة فعلا أنا من 1995 من ساعة ما اتخرجت من المعهد وأنا بشتغل في استوديو الدولة وفي صوت العرب، ليه دلوقتي اتطلب في مشهد أو مشهدين، أنا في رمضان في كاستينج دايركتور عرض عليا مشهد مع المخرج حسين المنباوي في مسلسل مناعة وبعد ما وافقت حسين نفسه رفض وقال مينفعش أجيب ناني في مشهد الست دي طول عمرها بتعملي شغل كويس، الكاستينج دايركتور دمر الدنيا ودمرني أنا شخصيًا.
_ما شعورك بعد مكالمة كريم الحسيني لها؟
ج: أنا سعيدة جدًا مكنتش أتوقع أن الدنيا كلها بتحبني كده، وأن ناس كتير معاها رقمي، وأن حبي في قلوب الناس، كله بيدعيلي من قلبه بجد، أنا سعيدة أوي بكريم اشتغلنا مع بعض قبل كده مسلسل حقي برقبتي، وعملنا نساء لا تعرف الندم وبجد فرحانة جدًا أني بتعامل معاه.
_هل بالفعل تواصل معاكِ الفنان أحمد العوضي للمشاركة في مسلسل برمضان المقبل؟
ج: أه ده حقيقي ولكني معرفش أي حاجة ولا عن المسلسل ولا عن الدور، وشركة سينرجي كانت مكلماني من قبل ما ادور على شغل وقالتلي لو عملنا أوف سيزون هكون معاهم، وأحمد العوضي مكلمنيش بشكل شخصي هو كلم أحد المواقع وقالهم أنه مستعد يشغلني معاه السنة الجاية.
_حدثينا عن التعاون مع أحمد العوضي في مسلسل علي كلاي؟
ج: شاركت معاه قبل كده في علي كلاي وحق عرب، هو جميل وابن بلد بجد مش مغرور ولا متكبر.
_ما رأيك في السوشيال ميديا واللجان الإلكترونية والهجوم على فنانين بعينهم؟
ج: أنا شايفة أن السوشيال ميديا مزوداها، الناس كلها بتتكلم وهما ميعرفوش حقيقة حاجة، اللي بيحصل ده غلط وحرام، زمان كنا بنقرأ الأخبار في الجورنال ونروح عليه، أنما حاليًا بجد السوشيال ميديا صعبة أوي، مسافة ما نزلت المشنور لاقيت انتشر بشكل رهيب وكل الناس كلمتني.
_ما رأيك فيما حدث مع سهام جلال رحمها الله؟
ج: أنا بحبها أوي واشتغلنا مع بعض أعمال كتير، كل اللي أعرفه انها كانت تعبانة برجلها ومعرفتش اتواصل معاها، وكانت بتقول يا جماعة أنا بيجبوني في 3 مشاهد وأنا تاريخ مينفعش، دور عمرها كانت معلمة في السينما والدراما.
_ما رسالتك إلي المخرجين بعد أزمتك؟
ج: أنا قديمة وأتمنى منكم تفتكروني، وبتمنى مقعدش القاعدة دي تاني واستلف واقعد بالسنة والاتنين، واقعد اعيط واتصرف من هنا ومن هنا، من كتر العياط أنا عيني راحت، وبقيت بلبس نضارة قراءة عشان مش بعرف أشوف حتى التليفون، بتمنى متسبونيش وادوني فرصة عمري مش مشهد ومشهدين.
