ريهام عبدالغفور: «مليش في الكورة» لكن ابني السبب في حضوري الفانزون

في لقاء مع الإعلامية منى الشاذلي، تحدثت الفنانة ريهام عبدالغفور عن حضورها فعاليات Egyptian Fan Zone بالعاصمة الإدارية الجديدة ضمن أجواء متابعة كأس العالم 2026.

وقالت ريهام خلال اللقاء: «أنا ما ليش في الكورة قوي، هو ابني الصغير بيحب الكرة قوي، وأنا الحقيقة كنت تعبانة ومش قادرة أجي خالص، بس جيت على نفسي علشان هو الموضوع بالنسبة له حياة وموت يعني».

وأضافت: «أنا جيت مع جوزي وابني وصاحبه، وبصراحة كنت جاية مغلوبة على أمري، بس أول ما جيت اتبسطت جدا، الأجواء حلوة قوي والطاقة والناس مبسوطة جدا».

وتابعت: «بجد أنا مبسوطة إني جيت، لأن المكان مبهر جدا، وفيه روح حلوة وطاقة إيجابية مش طبيعية، حتى إحنا في الطريق كنا منبهرين بشكل العاصمة والمونوريل والتنظيم كله».

وأشارت إلى أن تجربة العاصمة الإدارية والمونوريل أضافت طابعا مختلفا للأجواء، قائلة: «من أول ما ركبنا المونوريل حسيت إني في مصر جديدة خالص، الموضوع منظم ونضيف جدا، وحقيقي حاجة تفرح».

وعن ابنها قالت: "ابني هو السبب الأساسي في إني أجي، هو اللي عاشق الكورة بشكل كبير جدا، وكان متحمس جدا للتجربة كلها، وأضافت: “أكتر حاجة عجبت الولاد هنا حجم الشاشة والإنرجي بتاعة المكان، حاجة مبهرة جدا، وفعلا فكرة الفانزون عظيمة”.

وعن علاقتها بكرة القدم أوضحت: «أنا مش من الناس اللي بتتابع الكورة قوي، بس بابا الله يرحمه كان زملكاوي وامي كمان بتحب الكورة، فكان بيتنا دايما فيه جو كورة وماتشات».

وتابعت: «بشوف ماتشات المنتخب أحيانا مع ابني، وببقى متحمسة معاه، حتى لو أنا مش فاهمة كل التفاصيل، بس الجو بيخليني أندمج وأتفرج»

وأكدت: التجربة دي مختلفة وجميلة جدا، ومبسوطة إني كنت جزء منها، حتى لو جيت غصب عني في الأول، بس في الآخر انبسطت جدا.