مأساة طالب حلوان: «نجحت بالليل.. وصحيت لقيت نفسي شايل 5 مواد بسبب المصروفات»
نشر موقع "نيوز رووم" استغاثة من الطالب أحمد، المقيد بكلية الخدمة الاجتماعية بجامعة حلوان، قال فيها إنه وعددا من الطلاب واجهوا مشكلات تتعلق بنتائجهم الدراسية، مشيرا إلى أن أكثر من 1000 طالب تضرروا من آلية إعلان النتائج، مع توجيه انتقادات لإدارة المنظومة التعليمية واتهامات بتغليب الاعتبارات المالية.
من نجاح لرسوب في 12 ساعة
وأوضح أحمد كيف تبدلت الفرحة بصدمة في أقل من يوم، قائلا: "إحنا اتفاجئنا إن النتيجة نزلت بالليل يوم الاثنين وكنت ناجح، لكن صباح الثلاثاء شالوها ونزلوها تاني بعد تعديلها، ولقيت نفسي شايل مواد.. والمشكلة مش عندي لوحدي، إحنا أكتر من 1000 طالب شايلين مواد، وفيه طلاب كتير شايلين أكتر من 5 مواد في الترم الواحد".
سبوبة الساعات المعتمدة
وكشف الطالب عن مفاجأة حول تحويل نظام الدراسة من الفصول العادية إلى الساعات المعتمدة، مؤكدا أن الهدف بدا ماديا بحتا، قائلا: "تاني ترم عملوا نظام فصول ساعات معتمدة، النظام ده بيعتمد على أنك أنت تشيل مواد بشكل مفتوح وتحاسب على المادة بالساعة، وخلوا الساعة من 250 جنيه عشان يعني نعرفكم أنها نظام مادة وفساد، المادة واقفة بـ 750 جنيه، ما اعترضناش قولنا هنطلع سنة تانية ونمتحنهم سمر كورس".
أرقام صادمة وتصحيح عشوائي
وأشار الطالب إلى أن نسبة الرسوب وصلت لأرقام كبيرة، موضحا: "80% لـ 85% من الطلبة شايلين 5 مواد.. إزاي الترم التاني من ساعة ما عملوا النظام ده وكله بيشيل مواد بالمنظر ده؟ حتى ليدر الدفعة اللي هو مساعد الدكتور شايل 5 مواد، ده من كتر ما بيصححوا عشوائي".
لغز الـ 5 أيام والـ 40 درجة
وعن سرعة إعلان النتيجة والتحكم في الدرجات، قال أحمد: "إحنا مخلصين امتحانات يوم 25، والنتيجة نزلت يوم 8-6، يعني النتيجة اتصححت في 5 أيام.. النتيجة كانت بتقعد شهر وشهرين، النتيجة تتلعب فيها في 5 أيام، ده كلام مش معقول".
وأضاف موضحا أزمة أعمال السنة: "قالولي إحنا رمينا على الدكاترة إن أعمال سنة 40 درجة مسؤولة من الدكتور، والنجاح من 50، لكن النظام ده بيخلي النجاح من 60.. يعني لو الدكتور ماداكش الـ 40 درجة عمرك ما هتعرف تنجح، لازم تقفل المادة 100% عشان تنجح من غير درجات الدكتور، وهم لعبوها بالطريقة دي، كلنا شايلين على درجة ونص درجة".
رد الكلية ومطالب الطلاب
وأكد الطالب: "اتكلمنا مع عميد الكلية ووكيل الكلية مفيش أي فائدة، والالتماس مبيتقبلش، يقولك النظام الإلكتروني مبيغلطش.. إحنا عايزين نوصل صوتنا للمسؤولين يشوفوا المهزلة دي ومفيش حد بيفيدنا، ياريت صوتنا يوصل".
