طارق نور: انتقاد الرئيس السيسي لمسلسلات رمضان «مناعة مش منع»
علق طارق نور، رئيس مجلس إدارة الشركة المتحدة للخدمات الإعلامية، عن تصريحات الرئيس عبدالفتاح السيسي بشأن مسلسلات دراما رمضان 2025، والتي انتقد فيها بعض الظواهر مثل انتشار البلطجة.
وقال نور، خلال حواره ببرنامج «kwn trending» على قناة «القاهرة والناس»، إن الرئيس عبدالفتاح السيسي لم يطلب منع أي شيء من قبل.
وأضاف: «لما رئيس الجمهورية يقول خلى بالكم من حاجة مش معقول إني محترمش حاجة زى كده، ومتبصلهاش ومتاخدهاش جد، عمره ما منع ولا قال حاجة خالص، وأي بلد عربي النهارده رئيسها هيقول إحنا كمصريين هنحترم ده قبلهم حتى، عمرنا ما هنعمل حاجة تمس البلد اللى قدامنا، ويكونوا هما زعلانين منها أو شايفينها زيادة عن اللزوم».
وأوضح: «مين قال إن إحنا معندناش حرية تعبير؟! انت في إيديك موبايل، في حرية تعبير مطلقة، عندك مطلق الحرية إنك تتفرج على أي محتوى انت عايزه».
وتابع نور: «الرئيس ممنعش، الرئيس بيقول خلى بالكم يا ناس ياللى بتعملوا المحتوى… دى مناعة وليست منع، من يدير البلد عندهم مسئولية مجتمعية، وأنت ممكن تشوف حاجة تعتبرها جدعنه لكنها تؤثر على المجتمع».
وأوضح أن تصوير البلطجة ليس محظورًا، لكن تقديمها بطريقة غير واقعية، واستخدام أساليب مبالغ فيها، قد يؤدي إلى تأثيرات سلبية على المجتمع.
وأكمل: «البلطجة مش ممنوع تعرضها، لكن أنك تتكلم بصوت معين دا مش حقيقى ويقولك دا اللى بيحصل في مصر، حقيقى مش دا اللى بيحصل في مصر، وتبص تلاقى كله بيقلد ده».
