«إحنا فاهمين كويس أوي أنتو بتعملوا إيه».. سيد علي يعلق على أزمة تورتة الصليب
علق الإعلامي سيد علي على واقعة رفض احد المحال التجارية رسم صليب على تورتة عيد ميلاد طلبها أحد المواطنين، قائلا: «الراجل راح يشتري تورتة وطلب من محل أنه يعمله عليها الصليب فالراجل رفض والراجل طلع وقال والدنيا قامت ومجموعم المتعلمنين المتأمريكين وبدأوا يقولو اه ما هو لو كان الشيخ مش عارف مين كانو عملوه ودخلو الشيخ الشعراوي كمان وعملوها فتنة».
وأضاف، خلال تقديم برنامج «حضرة المواطن» المذاع على قناة الحدث اليوم، «وبعدين الراجل اللي طالع وقاعد يصرخ ويشتكي ده ماتروح للمحل اللي بيعملك كل سنه وانت حر في عقيدتك وكل واحد حر في عقيدته، وفيما يخص الصليب يعني المسيحيين بيتعاملو على أن المسيح هو اللي صلب عليه وإحنا في الإسلام نحب الصليب كما جاء في القرآن أن الصليب هو اللي حمى سيدنا المسيح».
داخل المسيحية جديد
وتابع: « المسألة بسيطة خالص يعني إنما في ناس لازم تنكش في السوشيال ميديا وتعملها حكاية، وكمان الراجل اللي في الفيديو بيشتكي ده بيقول أنه داخل المسيحية جديد يعني طالع يعمل فتنة والعلمانيين عملوها حكاية»، منتقدا ماحدث قائلا: «يعني واحد استطاع أنه يعمل فتنة في البلد».
وأكد على أن هناك طابور قاعد متنمر للإسلام والمسلمين والأزهر، متابعا: «وعايز يعمل فتنة وعايز يبلغ أسياده في أمريكا أنه إحنا بنقوم بالدور بتاعنا»، مشددا على أن مصر من أعظم الدول في العلاقة بين المسلمين والمسيحيين والعلاقات الشعبية والعلاقات الوثيقة بين نسيج الأمة الواحد أقوى بكثير ممن حاولو الإيقاع بها، وذلك لأن المسلم المصري القبطي المسيحي متسمك بمصر ويعرف ماذا فعل المسلمون.
وانتقد قائلا: «إنما محاولة الفتنة الرخيصة اللي بتحصل واحد يروح يشتري تورته ويوقله اعملي عليها صليب فالتاني يقوله لا مش هعملك على فكرة إحنا فاهمين كويس أوي أنتو بتعملوا اي وانكم عايزين توقعوا وتثيروا الفتنة في البلد».
وفي سياق آخر، نشر موقع «نيوز رووم» شكوى لأحد المواطنين أعرب خلالها عن استيائه من رفض بعض محال الحلويات وضع رمز الصليب على تورتة عيد ميلاد نجله، معتبرا أن ما حدث يعكس حالة من التعصب والتمييز غير المقبولة.
وقال المواطن: «مشوفتش تعصب وقلة أدب بالشكل ده قبل كده في حياتي، وأنا عمري ما أطلع وأتكلم في الموضوع ده، لكن اللي حصل مضايقني جدا، لأن معقول يكون عندنا تعصب وجهل للدرجة دي».
