تامر عبدالمنعم يعلن اتخاذ إجراءات قانونية ضد مروجي شائعات وفاته
رد الفنان والإعلامي تامر عبدالمنعم على ما تم تداوله من شائعات وفاته، عبر مواقع التواصل الاجتماعي، مؤكدا أنها سببت له أذى كبيرا له ولأسرته، خاصة ما يتعلق بنشر أخبار عن وفاته واصفا هذه الأخبار بأنها كاذبة ومفبركة.
شغلنا كفنانين وإعلاميين بيكون في أي وقت
وقال تامر عبدالمنعم في بداية البث المباشر عبر صفحته الرسمية،: “أنا خارج من العيد وداخل على شغل كتير، وفيه ناس بتشتغل وبتجتهد في شغلها عادي في الأعياد والمواسم، وده طبيعي”.
وأضاف: “شغلنا إحنا كفنانين وإعلاميين إننا نشتغل في أي وقت، بنقدم مسرح وفيلم وبرنامج، وبنحاول نعمل اللي علينا، ومفيش أي مشكلة عندي في إن أي حد يختلف معايا، سواء كان بيكرهني أو مش حاببني أو ضد أفكاري، مفيش مشكلة خالص”.
أنا مش بدخل عمل فني علشان أهاجم حد
وتابع موضحا: “أنا مش بدخل عمل فني علشان أهاجم حد، ولا علشان أقدم حاجة وحشة، بالعكس أنا شايف إن اللي بقدمه هو أفضل حاجة أقدر أقدمها، لكن طبيعي تلاقي ردود أفعال متباينة، ممكن حد يشوف حاجة ويقول رأي مختلف، وده حقه”.
وأضاف: “ما عنديش مشكلة أتعامل مع أي حد مختلف معايا، الخلاف لا يفسد للود قضية، وإحنا بشر وكلنا بنجتهد عشان نقدم حاجة”.
شائعات وفاة تامر عبدالمنعم
ثم انتقل للحديث عن سبب ظهوره المفاجئ: “فجأة وأنا في المسرح، عندي عرض مسرحي، وفجأة لقيت عدد مش طبيعي من الاتصالات والرسائل، لدرجة إن التليفون كان بيرن بشكل غير طبيعي، وكل الناس تقريبا بتسألني نفس السؤال: انت كويس؟ انت عايش؟”.
وأضاف: “لما رديت على المكالمات عرفت إن في فيديو منتشر على تيك توك بيقول إني مت، وبيقولوا كمان كلام غريب جدا زي إني خرجت من المرعشلي، وده كلام مش منطقي ومش حقيقي خالص”.
وتابع بانفعال واضح: “الفكرة نفسها صعبة جدا، إن حد يقول على حد إنه مات وهو عايش، دي كلمة تقيلة جدا على السمع، وتقيلة على القلب، وبتأثر على أي إنسان طبيعي”.
وأضاف: “تخيلوا إن الموضوع وصل لأهلي وولادي، بناتي، وناس قريبة مني، وده خلاني أكون في حالة صعبة، لأن في ناس ممكن تتأثر فعلا بالكلام ده، وفيه ناس عندها ظروف صحية ممكن تتأذى”.
ابني آدم حس بالزعل وادايق جدا
وقال: “أنا مش روبوت، أنا بني آدم بحس وبزعل وبدايق، وبشوف الكلام اللي بيتقال عني، ومش طبيعي أبدا إن الخلاف في الرأي يوصل لإشاعات موت وتشويه بالشكل ده”.
وتابع: “أنا بشتغل وبحاول أطور من نفسي، وبعمل مسرحيات وبرامج، ومش بتقاضى عليها مبالغ ضخمة زي ما البعض بيقول، لكن في ناس هدفها بس الهدم وتشويه أي حاجة ناجحة”.
وأضاف منتقدا: “بعض الناس بقت شغلها الشاغل إنها تطلع إشاعات أو تهاجم أي حد ناجح، ومفيش أي ضمير في الموضوع، لا مراعاة لأسرة ولا لأطفال ولا لأي حاجة إنسانية”.
وقال : “لو حد مختلف معايا في رأي أو عمل، يتفضل يختلف باحترام، لكن نشر إشاعات موت أو تشويه ده شيء غير مقبول تماما”.
تواصلت مع المحامي وسأتخذ الإجراءات القانونية
وأعلن عن تحرك قانوني: “أنا تواصلت مع المحامي بتاعي، والمستشار القانوني، وبكرة الصبح هيتم تقديم بلاغ في مباحث الإنترنت ضد الشخص أو الحساب اللي نشر الكلام ده، ومش هتنازل عن حقي”.
وأضاف: “ولو الشخص ده داخل مصر، هيتاخد ضده إجراء قانوني، لأن ده تشهير ونشر أخبار كاذبة، ومش هسكت على ده”.
واستطرد قائلا: “مش معنى إنك على الإنترنت إنك تقدر تقول أي حاجة وخلاص، لازم يكون في ضمير، لازم يكون في حدود، لازم نفهم إن في ناس ليها حياة وبيت وأهل”.
وتابع: “اللي حصل ده مش مجرد تريند، ده أذى حقيقي، وأنا شايف فيديوهات وصور مركبة عليا وعلى اسمي، ومفيش أي احترام للإنسانية في الموضوع”.
وأضاف: “فيه ناس بتاخد الموضوع هزار أو تريند، لكن لما الموضوع يوصل إن حد يتقال عليه مات وهو عايش، ده شيء خطير جدا”.
وأكد: “أنا بشر، وبطلب من الناس كفاية، كفاية شائعات وكفاية أذى، ولو حد عايز ينتقد ينتقد باحترام، لكن كده لأ… وأنا هكمل شغلي عادي ومش هوقف حياتي بسبب كلام ناس”، وأنه مستمر في عمله الفني والإعلامي، وأنه سيواصل اتخاذ الإجراءات القانونية ضد مروجي الشائعات.
