بعد سهام جلال.. شريف إدريس لأمير كرارة: "شوفته بعيني بيرشح ناس لسوق الكانتو"
علق الفنان شريف إدريس على أزمة الفنان أمير كرارة مع الفنانة الراحلة سهام جلال، حيث كشف عن رؤيته للفنان أمير كرارة وهو يرشح فنانين لأحد الأعمال الدرامية، وذلك من خلال منشور عبر حسابه الرسمي على موقع التواصل الإجتماعي فيسبوك.
شريف إدريس يبرأ أمير كرارة
حيث قال شريف إدريس موضحًا: “رحم الله الفنانه سهام جلال، بس عايز اتكلم في حاجه ويشهد عليها ربنا، في حق أمير كرارة، ودي شهاده اتحاسب عليها قدام ربنا، أي عمل فني له مخرج ومنتج هما أصحاب القرار في مين يشتغل ومين مايشتغلش فيه نجوم بتفرض رائيها وبتحب تشتغل مع ناس معينة وفيه نجوم مابتدخلش غير بالخير وكل اللي بيعمله أنه ممكن يرشح حد ويقول وجهة نظره والقرار الأول والأخير بيكون في إيد المخرج وفي إيد المنتج، ودي حاجة ماحدش يقدر يلومه أو يلوم غيره عليها، أنا شفت أمير بعيني بيرشح زملاء للمخرج حسين المنباوي في مسلسل سوق الكانتو منهم اللي ربنا وفقه واشتغل ومنهم اللي ماكانش له نصيب، وعلي فكرة من بعد سوق الكانتو أنا عارف ووصلني اكتر من مره أن أمير رشحني في أعمال وماحصلش نصيب أني اشتغل فيها لأن الرزق والشغل بتاع ربنا لا أمير ولا غيره”.
شريف إدريس يتذكر موقف شهامة جمعة بـ أمير كرارة
واستكمل شريف إدريس حديثه قائلًا: “واعتقد أن الزميلة العزيزة الراحلة سهام جلال هي زعلت من موقف التليفون أنه ماردش لأن حصل لغبطه في تسجيل الارقام ودي حاجة غير مقصودة والله يرحمها أمير تواصل معاها واتصافو ومكانش فيه بينهم أي زعل وهي كتبت كلام جميل في حقه بس انتو دورتو علي كلام التريند ونشرتوه، يشهد الله أن أمير كرارة إنسان جدع ومتربي وابن اصول وعمره ما اتأخر عني ولا عن غيري في اي حاجة، حاجة أول مرة هاقولهالكم، واتمني أن أمير مايزعلش مني أني قولتها، وأنا بصور سوق الكانتو والدي توفي (الله يرحمه ويحسن اليه)، أمير ماسابنيش لحظة ورحمة أبويا حتي عزا والدي في مسجد الشرطه هو اللي اتكفل بيه، وجه ووقف معايا في العزا لحد ما العزا شطب.، أنا كان لازم اتكلم واقول حق ربنا، ربنا يرحم الزميلة العزيزة سهام جلال ويصبر أهلها ومحبينها ويخليك يا أمير يابن الناس الطيبين لبيتك وولادك، وشكرا علي كل حاجة حلوة عملتها معايا”.
