لازم تموت ؟ .. ريهام سعيد تنتقد الاهتمام الإعلامي بـ سهام جلال بعد وفاتها
انتقدت الإعلامية ريهام سعيد الاهتمام الإعلامي بالفنانة سهام جلال بعد وفاتها، خلال ساعات متقدمة من صباح اليوم الثلاثاء، حيث أشارت إلى تجاهلها في حياتها وعدم حصولها على فرص تمثيل.
ريهام سعيد تنتقد الاهتمام بـ سهام جلال بعد وفاتها
وكتبت ريهام سعيد عبر صفحتها الرسمية على فيسبوك : "دلوقتي بقت مهمة وأخبارها في كل مكان ؟، علشان ماتت خلاص ففي حاجة نتكلم فيها ؟، علشان هنصور الجنازة والعزاء وهيدخل لنا دولارات ؟".
وتابعت ريهام : "ياما كانت عايزه تظهرفي فيديوهات وسوشيال ميديا وبتحاول تقول أنا أهو، بس للأسف التمثيل بالذات الناس بتتفق مين يشتغل ومين يقعد في البيت، طلبت المساعده من الزملا وهي عارفه إنه محدش بيساعد غير لو في مصلحة".
بقت مهمة علشان ماتت
وأكملت ريهام سعيد : "بقت مهمة وأخبارها كتير بعد ما ماتت، بقت مهمة علشان ماتت، لكن وهي عايشة وسطينا بتحاول تقول أنا موهوبة وموجودة محدش عبرها، وخصوصًا إن اللي بيشتغل شغلنا ده مابيعرفش يشتغل حاجة تانية".
واختتمت ريهام : "لازم نموت عشان نتقدر، ياما خرجت محدش صورها بس دلوقتي ملمومين حوالين نعشها عشان يتسابقوا يصوروها وهي جثة، في رخص كده ؟، الله يرحمك، أكيد رحتي للأحسن والأعظم والأرحم".
جنازة سهام جلال
وكانت قد شُيعت جنازة سهام جلال بعد صلاة الظهر اليوم من مسجد حسن الشربتلي، وتغيب عن الحضور عدد كبير من نجوم الفن الكبار الذين تعاونت معهم سهام عبر مسيرتها الفنية، وكان من أبرز الحضور الفنان فادي خفاجة، الفنان أحمد منير، والفنان بسام رجب.
سبب وفاة سهام جلال
وكان قد كشف مصدر مقرب من الفنانة سهام جلال عن بعض التفاصيل الخاصة بمرضها والتي أدت إلى خضوعها للعملية الجراحية ، مشيرًا إلى أن الأشعة والتحاليل كانت لا تؤهلها للخضوع للعملية.
وقال المصدر في تصريحاته لـ نيوز رووم : “الأشعة والتحاليل اللي اتعلمت ماكنتش تأهلها إنها تعمل عملية، ولكن الدكتور وهي قرروا إنها تعمل العملية علشان كانت تعبانة ، وخرجت من العملية عضلة القلب عندها ضعفت، ودخلت العناية المركزة وعملوا إنعاش للقلب، واشتغل تاني وبعدها وقف وماتت ”.
