الدجوي: كاميرات المراقبة والتحويلات البنكية تثبت براءتي وبراءة شقيقي الراحل
تحدث عمرو الدجوي عن تطورات النزاع القضائي الدائر بينه وبين أطراف أخرى من عائلة الدجوي، مستعرضًا ما دار خلال إحدى الحلقات التلفزيونية التي ناقشت القضية.
وقال في منشور له على صفحته الرسمية بموقع “ الفيس بوك":"ده كان سؤال منطقي من الإعلامي المحترم أحمد سالم لمحامي الخصوم عن مدي وعي ماما نوال الدجوي من واقع إجابات ماما نوال في تحقيقات النيابة،و انا اعتقد انه أخيرا قال كلمه حق الحمد لله و بشكره علي شهادته دي".
وأضاف :" وعشان الناس اللي مش فاضيه ده ملخص حوار إمبارح بين المستشار القانوني الخاص بيا و المحامي بتاعهم مع الإعلامي المحترم احمد سالم، بدأ الحوار بتوضيح المستشار القانوني بتاعي طبيعه الخصوم و خلفيتهم، فشرح ببساطه إزاي حاول الخصوم تلفيق قضية سرقة خزائن ماما نوال ليا أنا و أخويا المرحوم أحمد الدجوي".
تابع :" ببساطه عشان الناس تبقي عارفه احنا بنتعامل مع مين، ومدي الإجرام، عشان ده مهم ، ولا ايه ، سرد المستشار القانوني بتاعي ازاي اتفقوا اللصوص مع حرامي الخزن، ازاي دفعوا له مبلغ ٧٨٠ الف جنيه، ازاي فصلوا الكاميرات بتاعت المراقبه، ازاي نقلوا المسروقات في شنط سفر كبيره من شقه أكتوبر لشقق الحراميه في الزمالك، ازاي الحرامي استخبي في شقه في نفس المبني قبل وصول الشرطه و حاول يوهم الشرطه انه جاي من بيتهم".
وأوضح :"لكن كاميرات المراقبه أثبتت انه مدخلش من المدخل و اثبتوا انه كان مستخبي بالاتفاق مع اللصوص التانيين، حكي من واقع التحقيقات علي اعترافات حرامي الخزن علي الاتفاقات واللي اثبتتها كاميرات المراقبه و التحويلات البنكيه من اللصوص الي حرامي الخزن، و اعترافات الحرامي ان السرقه مكانتش دي بس، دا سرق بيت الزمالك كمان سنه ٢٠٢٢ بالاتفاق مع نفس اللصوص، و حرامي الخزن طلع أذكي منهم و سجل لهم الاتفاقات عشان لو وقع ميقعش لوحده، و الشرطه و النيابة أثبتت الحاجات دي في التحقيقات".
يكمل :" رد المحامي بتاع الخصوم بكلام مفهمتش منه اي حاجه والله انا اسف، بس المختصر ان الشرطه مأثبتتش فين السرقات و ايه هي المسروقات و بالتالي مفيش جريمه، و انهي كلامه بإن انا واخويا اللي حراميه،وهنا ليا تعقيب سريع معلش عشان الناس مش عبيطه يا متر، طيب و تنازلتوا ليه عن القضيه و المحاضر لما انا و اخويا اللي حراميه يا متر يعني الكاميرات جايبه عملية السرقه و فيها الحراميه الاصليين، و حرامي الخزن اعترف ، و في تحويلات بنكيه من اللصوص لحرامي الخزن، وانا و اخويا اللي حراميه برضو، طيب ما تيجوا نستكمل هذه القضيه و تلغوا التنازل و نحبس المجرمين، و انا جاهز اتحبس لو طلعت انا الحرامي يا متر".
