افتكر آخر مرة وجعتك فيها علاقة حب !!حسيت بإيه؟ لو قلبك كان بيخفق من الخوف أكتر ما يطمن ولو دموعك بقي روتين يومي يبقى لازم نقولها بصراحة:
لو بيوجعك… ماتسموش حب.
الحب مش لازم يوجعك”
في ناس كتير فاكرة إن الحب الحقيقي لازم يكون وراه تعب دموع، وتضحيات وكأن الألم هو الدليل الوحيد على صدق المشاعر. بس الحقيقة إن الحب مش معركة ومش مفروض يكون مصدر وجع.
الحب الحقيقي بيطمنك بيهدي قلبك مش بيخليك تعيش في حالة قلق وتوتر بيكبرك مش يكسرك.
لما تبقى في علاقة صحية، بتحس إنك مرتاح ، قادر تكون نفسك من غير خوف أو تصنع.
الحب مش مفروض يسحب منك طاقتك ولا يخليك تعافر عشان تحافظ عليه طول الوقت.
في العلاقات السامة الوجع بيبقي ثابت مش لحظه ضيق… لأ، ده تعب مستمر بيستنزفك كل يوم شوية تحس إنك بتقدم كل حاجة وما بتاخدش أي حاجة غير لوم و شك، وسحب لثقتك في نفسك.
العلاقة دي بتكسر فيك حاجات وتخليك تشك في قيمتك وتعيش دايمًا على أعصابك، مستني اللحظة اللي هتهدى ومش بتهدى.
الأسوأ إن الشخص المؤذي مش بيظهر على طول كده ساعات بيكون لطيف، معتذر، حنين وده بيخليك تشك في إحساسك وتقول يمكن أنا اللي غلطان. لكن الحقيقة إن التذبذب ده هو السم الحقيقي هو اللي يخليك متلخبط، متألم، ومش قادر تمشي… ولا قادر تكمل.
أوقات بنقع في علاقات سامة ونفضل نحاول ونستنزف نفسنا، ونقول “يمكن يتغير”، بس السؤال الحقيقي: ليه نتمسك بحاجة بتوجعنا؟ الحب اللي يستاهل قلبك، هو اللي يريحك ، مش اللي يستهلكك.
اختيارك لسلامك مش ضعف، دي قوة. لما تمشي من علاقة بتؤذيك، أنت مش بتنهزم، أنت بتحترم نفسك . الحب الحقيقي يبدأ من هنا… من حبك لنفسك.
مش لازم العلاقة تكمل عشان تثبت إنك حبيت بجد. أوقات، الحب الحقيقي هو إنك تمشي لما تحس إنك مش في المكان الصح وساعتها هتكتشف إنك مش لوحدك لأنك لقيت أهم حد في حياتك : نفسك.
وفي الآخر؟
افتح بابك للحب من تاني بس ما تفتحش قلبك للوجع لأنك تستحق تحب وتتحب… من غير ما تتكسر.
