حفيد نوال الدجوي يكشف تطورات حالتها الصحية: “ربنا أنعم عليها بالنسيان”
أثار عمرو الدجوي حفيد نوال الدجوي، جدلًا كبيرًا، بعدما تحدث عن حاله جدته الصحية ، مؤكدًا أن ربنا أنعم علىها بنعمة النسيان ولم تعد تتذكر شيئًا في حياتها.
وأضاف عمرو الدجوي على حسابه بموقع "الفيس بوك":"يا ولاد ماما نوال يظهر ان ماما نوال قررت تدينا درس جديد في الدنيا و ألاعيبها قررت تعرفنا الغث من الطيب الغريب من القريب، ربنا أنعم عليها بالنسيان، النسيان نعمه، نسيت ان كل اللي بتحبهم تقريبا راحوا، رحمة ربنا بيها انها تنسي رحمة ربنا بيها انها تعيش في الماضي".
وتابع :"لينا احنا نشوف اللي حصل درس، درس في الدنيا، درس نعمل حساب بكره، درس نتعلم منه ان الحرامي ممكن يكون قريب ، والحبيب ممكن يكون غريب، و ان الصحاب وقت الشده بس، درس نعرف ان في إعلام شريف و أقلام نضيفه، و إعلام رخيص بيكتب بالفلوس و المصلحه".
وأكد أنه "ما ضاع حق وراءه مطالب، و الحرام مش دايم، و قضاء مصر عظيم و شريف و كبير اوي، و حتي لو الحرامي و النصاب كسب جوله، فوالله الجايزة بتكون في الآخر، و الكسبان دايما بيضحك في الآخر، و انا عارف ان أنا اللي هضحك في الآخر".
وفي وقت سابق أثار عمرو الدجوي حفيد نوال الدجوي، حالة من الجدل بعد تصريحات تحدث خلالها عن الحالة الصحية لجدته، مؤكدًا أنها تعاني من فقدان الذاكرة، ومشيرًا إلى وجود مخاوف على حياتها وممتلكاتها.
وقال عمرو الدجوي على حسابه بموقع فيس بوك:«ماما نوال مش فاكرة حاجة.. والله ما فاكرة حاجة!، ماما نوال مش فاكرة أملاكها ولا ممتلكاتها، ولا تعرف هما بيتكلموا معاها في إيه، لو سألوها تعرفي إن أحفادك سرقوكي مش هتعرف.. لو سألوها في أي تفاصيل مش هتجاوب».
أضاف: «هل يعقل نسيبها في إيد ناس تحقيقات النيابة أثبتت إنهم خططوا ودبروا ونفذوا وسرقوا ذهبها وأموالها من جوه بيتها! هل ده يعقل، هل يرضي حد فيكم على أمه كده.. هل ممكن تكون دي ناس أمينة على حياتها وممتلكاتها، حياتها معاهم في خطر والله والله في خطر هسيب لكم في التعليقات أقوالها».
وكان نشر عمرو الدجوي، حفيد نوال الدجوي، منشورا عبر حسابه على موقع التواصل الاجتماعي فيس بوك ، تحدث فيه عن أجواء من التوتر والجدل في سياق رواية وصفها بأنها مستوحاة من قصة حقيقية.
وقال عمرو الجوي في منشوره: «لا لا لا ينفع ينفع بجد. عاوزك تهدي كدة إحنا لسه مبدأناش خالص! هل يعقل يعني يقولوا لي إنك منهارة ومش بتنامي وشاكة في كل الناس وخايفة الناس تكون بتسجلك وماشية تبصي مين بيصور ومين باصص!!».
أضاف: «طيب ينفع يعني تقولي لهم شوفوا مين عندي في الأصدقاء ومين كتب comment ومين عمل like! ده حتى مش شغل مجرمين محترفين سبتي إيه لولاد الحرام كده! آه نسيت أقول لكم إني بكتب قصة فيلم مستوحى من قصة حقيقية واقعية حدثت بالفعل وده جزء من الحوار اللي في الفيلم».
