مش شرط يلبس شارة الكابتن.. الونش عن السعيد: «معانا في كل القرارات المهمة»

تحدث محمود حمدي الونش عن الجدل الذي أثير مؤخرا بشأن شارة القيادة داخل نادي الزمالك، مؤكدا أن عبدالله السعيد يعد من أهم العناصر داخل الفريق، وأن قيمته لا ترتبط بحمل شارة الكابتن.

ووجه عمرو أديب سؤالا: "ناس كتير اتكلمت على الخناقة اللي بين عبدالله السعيد في الملعب لما قالوله خد إنت تبقى الكابتن، لا مشكلة.. إيه الحكاية؟ ما فهمناش إيه الموضوع؟".

عبدالله السعيد قيمة كبيرة جدا

ورد الونش: "طبعا، يعنيأنا في الفرقة بعرف كل حاجة، عبدالله السعيد قيمة كبيرة جدا في أوضة اللبس بتاعتنا، وإحنا بنتعلم منه، ممكن أنا تاني كابتن فرقة بعد الكابتن عمر، ولكن إحنا قبل ما ناخد أي قرار عبدالله بيبقى معانا في نفس القرار".

وتابع: "عبدالله السعيد قيمة كبيرة في الفرقة، وإحنا دايما لما بنتكلم مع اللعيبة لازم نتعلم منه، لازم نشوف الراجل ده بيعمل إيه عشان يوصل للمستوى الفني ده وهو عنده 40 أو 41 سنة، لازم كلنا نتعلم منه".

عبدالله السعيد لا يهتم بمسألة شارة القيادة

واستكمل الونش حديثه مؤكدا أن عبدالله السعيد لا يهتم بمسألة شارة القيادة، قائلا: "دي في حتة الملعب، أما بره فهو ما بيفرقش معاه أصلا إنه ياخد شارة، هو أكبر من إنه يلبس شارة والكلام ده".

وأشار لاعب الزمالك إلى أن جميع اللاعبين لا ينشغلون بمن يحمل شارة القيادة، موضحا: "إحنا بالعكس، ما بيفرقش معانا مين يلبس الشارة، زي ما حضرتك شفت قبل النهائي والنهائي لما دينا الشارة لمحمد شحاتة، إحنا كلعيبة ما بيفرقش معانا مين يلبس الشارة خالص".

الأهم داخل الفريق هو الحفاظ على الروح الجماعية

وأكد الونش أن الأهم داخل الفريق هو الحفاظ على الروح الجماعية، قائلا: "اللي بيفرق معانا إن إحنا نلم على نفسنا، والفرقة كلها تبقى في أجواء كويسة، ومحدش يبقى شايل من حد، واللي بيلعب يحب اللي ما بيلعبش، واللي ما بيلعبش يحب اللي بيلعب".