عمرو أديب لوالد بيزيرا: لو حد كلمك من الأهلي قوله ابني مرتبط
أكد رينان بيزيرا، والد اللاعب خوان بيزيرا، سعادته الكبيرة بعد تتويج نادي الزمالك بلقب الدوري، مشيرًا إلى أن مشاعر الفرح التي عاشتها الأسرة كانت لا توصف، وذلك خلال مداخلة مع الإعلامي عمرو أديب في برنامج "الحكاية".
كنت فرحان فرح رهيب وكنت مبسوط جدًا
وقال والد بيزيرا في مداخلة مع الإعلامي عمرو أديب، ببرنامج الحكاية: "في الحقيقة أنا مبسوط جدًا، ولما الزمالك كسب الدوري أنا كنت فرحان فرح رهيب وكنت مبسوط جدًا، وما عنديش كلمات أقدر أوصف بيها مدى السعادة اللي كانت جوايا، وحاجة فرحتنا كلنا وكنا مبسوطين جدًا جدًا جدًا بمكسب الزمالك وبمكسب ابني بيزيرا طبعًا بكل تأكيد، ومتمني إنهم يكملوا ويحصدوا البطولات ويكملوا الحلم".
وأضاف: "إحنا معاكم دايمًا وإحنا دايمًا بنشجع خوان إنه يكمل، وبنشجع فريق الزمالك ونتمنى له دايمًا التوفيق، وهو بيتمرن كتير جدًا ودايمًا بيحكي لنا عن مدى تمريناته ومدى المسؤولية اللي شايلها داخل نادي الزمالك، لأنه نادي كبير طبعًا، وإحنا بنتكلم مع خوان كتير جدًا وهو بعد ما كسب الدوري بيسعى لمكسب ما هو قادم".
وخلال الحوار، سأله عمرو أديب عن سبب بكائه بعد المباراة، قائلًا: "ناس كتير تأثرت لما شافتك بعد المباراة وإنت بتبكي.. إيه اللي كان مؤثر قوي كده؟".
الجمهور بيحب فريقهم وخصوصًا بيحبوا ابني
ورد والد اللاعب: "يمكن أكتر حاجة كانت في مشاعري هو الحب اللي أنا شوفته في الجمهور، والفرح اللي أنا شوفته في الجمهور، وقد إيه الجمهور بيحب فريقهم وخصوصًا بيحبوا ابني، ودي حاجة فرحتني جدًا، وفي الشارع كمان كنت بشوف الناس بتحيي خوان وبتحيي اللعيبة كلها، جمهور رائع وجمهور كبير وعظيم وقد إيه هما فرحوا بالدوري".
رسالة تحذيرية لوالد اللاعب بشأن النادي الأهلي
وفي فقرة طريفة من الحوار، وجه عمرو أديب رسالة تحذيرية لوالد اللاعب بشأن النادي الأهلي، قائلًا: "بص يا أبو خوان، إحنا هنا في مصر عندنا نادي اسمه النادي الأهلي، النادي الأهلي من ضمن هواياته إنه يحب لما يكون فيه لعيب في نادي الزمالك يستضيفوه في النادي الأهلي، فأرجوك لو أي حد كلمك من الأهلي قل له ابني مرتبط وعنده عقد وقاعد في نادي الزمالك، وجمهور الزمالك بيحبوه".
ليرد والد بيزيرا مؤكدًا: "طبعًا بكل تأكيد إحنا مركزين جدًا مع الزمالك، ومركزين مع فريق نادي الزمالك، وإحنا دلوقتي في أجازة، وبنفكر بكل تأكيد في الزمالك وفي اللي جاي وفي الموسم اللي جاي، بكل تأكيد إحنا معانا عقد مع نادي الزمالك وهنكمل مع نادي الزمالك".
