ردًا على بيان الموسيقيين.. حلمي عبدالباقي: "مش محتاج أحور عشان أكسب تعاطف"
خرج الفنان حلمي عبدالباقي عن صمته ليرد على إتهامات نقابة المهن الموسيقية التي وردت في بيانها الأخير بشأنه، وذلك من خلال مقطع فيديو عبر حسابه الرسمي على موقع التواصل الإجتماعي فيسبوك.
حلمي عبدالباقي:"عيب تقول مشطوب"
حيث قال حلمي عبدالباقي في الفيديو: "عيب تقول أني مشطوب ده حكم مبدئي لسه في استئناف وقضاء إداري ومجلس دولة، أنا بلتزم بالقضاء لأنه حقي القانوني، ٩٠٪ من مجلس التأديب كان حول موضوع ناصر صقر، مش محتاج احور أو اكدب عشان اكسب عطف الجمعية العمومية، كلهم بيحبوا حلمي عبدالباقي، والدليل على ذلك صندوق الانتخابات وأصواتهم ليا لم تحدث في تاريخ النقابة، بنقول أن في مساواة وشفافية بين الأعضاء بس في ناس اتعالجت بعد موضوع ناصر صقر بأرقام، فين الشفافية والمساواة؟".
وأوضح حلمي عبدالباقي مستكملًا: “أنت طلعت في التلفزيون وقلت في غفلة مني لاقيت إن الفلوس اتدفعت بعد ما 6 أعضاء مضوا اليومين دول، والفلوس دي مدفوعة من سنة، وهل الحسابات مقالتش لك؟، يعني أنت المفروض عارف كل صغيرة وكبيرة في النقابة، بتقول إنك توليت عالج عضو منتسب ربنا يرحمه بـ 172 ألف جنيه، وده بشهادة عضو مجلس وعضو جمعية عمومية، لما قالوا لك إن الراجل عمل حادثة وبين الحياة والموت وقعد في المستشفى لغاية ما توفى، أنا معنديش مشكلة وأنتم أخدتوا قرارات، ودايمًا بقول الرحمة فوق القانون، ده حد تعبان إيه المشكلة لما النقابة تقف جنبه؟، أنا مباخدش حاجة أحطها في جيبي، والشيكات كانت بتطلع على المستشفيات، قولي الشفافية فين وفين المساواة بين الأعضاء؟”.
حلمي عبدالباقي يكشف الحقيقة الكاملة
وأضاف حلمي عبدالباقي قائلًا: “علشان ننهي موضوع ناصر صقر، قولتلك أنا معرفش إن المبلغ بقى كبير بسبب تغيير بروتوكول العلاج، والراجل عمل فيديو وقال الكلام ده، وبعد أول جرعة خدها طلع في فيديو وكان زي الفل وشكر النقيب والنقابة، وقدمت فيديوهين لـ ناصر صقر في مجلس التأديب، وقلت لك ربنا عمانا عن الفلوس إنها بقت كتير علشان الراجل ربنا يشفيه، ولو في مسؤولية عليا أنا مستعد أدفع الفلوس، وأنت قلت في التلفزيون إني قولتلك مستعد أبيع عربيتي، ليه قفلنا على موضوع ناصر صقر وعالجنا الناس دي كلها؟، مش ده إنسان وده إنسان؟، لأ علشان حلمي عبد الباقي هو أساس موضوع ناصر صقر، نشيل ده على جنب يمكن يفكر ينزل انتخابات فنطلع له بقى، بس ربنا قادر على كل شيء وبيظهر الحقائق، لما موظفة غلبانة بتقبض 2000 جنيه، تيجي تطلب مني كشف بـ 200 جنيه، ولا حد عايز تحاليل بـ 250 جنيه، دول اللي هيهدوا المركز المالي للنقابة؟ بس إحنا عندنا فلوس ودايمًا بتقولوا فلوس الموسيقيين للموسيقيين، آه دول موظفين بس إيه المشكلة؟، أكيد مش محتاج أخد موافقة المجلس على قرار بـ 100 جنيه، دي تهمة غريبة."
وأختتم حلمي عبدالباقي حديثه قائلًا: تهمتي تهمة شرف، لم أتهم بسرقة ولا رشوة ولا أي حاجة مخلفة بالشرف، أنا برفع رقبتي قدام الناس وولادي وعائلتي، أني لم أُتهم بأي حاجة مخلة بالشرف، الحمد لله لغاية آخر لحظة في حياتي، تهمة شرف أني ساعدت في علاج إخواتنا الأعضاء الغير قادرين، وأقسم بالله أني عمري ما عملت جواب إعفاء لـ حد إلا لما قلت لـ النقيب وأنسب الفضل ليه قبلي، أنا بتعامل مع ربنا، والحمد لله أنا راضي بنفسي وواثق في ربنا، أنت من 2015 لغاية ما بقيت النقيب كانت أوردراتك قد إيه؟ وبعد ما بقيت النقيب أوردراتك بقت قد إيه؟، سؤال مشروع وأعضاء الجمعية العمومية عايزين يعرفوا.. إلى جانب كلامي على الساحل الشمالي.”.
