محمد صلاح العزب: "صورة الكارفان للممثل هي الكارنيه الحقيقي له"
كشف المؤلف محمد صلاح العزب عن أفضل شعور يشعر به أي ممثل وهو وجوده بجانب الكارفان الخاص به وعليه اسمه، وذلك من خلال منشور عبر حسابه الرسمي على موقع التواصل الإجتماعي فيسبوك.
محمد صلاح العزب يكشف عن أفضل شعور للممثل
وقال محمد صلاح العزب معلقًا: “من أجمل الصور اللي بتديني أنا شخصيا حماس وطاقة وحب، صور الممثلين لما بيتصوروا جنب اسمهم وهو مكتوب على ورقة A4 ومتعلق لأول مرة على باب كرافان أو أوضة ممثلين، صورة بسيطة جدا، وإنجاز ربما يبدو بسيط جدا للي ميعرفش، بس قد إيه الصورة دي وراها حلم كبير وتعب وسهر وإحباطات وإخفاقات وسهر وطموح وليلة ما يعلم بيها إلا ربنا، الصورة دي هي الكارنيه الحقيقي من الشغلانة نفسها مش من شخص ولا من جهة، ده التصريح اللي بعده على طول الممثل هيقدر يواجه الجمهور الكبير، دي الصورة اللي الممثل ده وهو بيتصورها بيبقى مرعوب تكون المرة الأولى والأخيرة، ونفسه يعيش في الكرافان أو الأوضة دي للأبد، ربنا يقدر كل واحد على حلمه، ويصبره عليه، ويحققهوله.”
المشاهد المحذوفة من فيلم سفاح التجمع
في سياق آخر، قد كشف المؤلف والمخرج محمد صلاح العزب لأول مرة عن المشاهد المحذوفة من فيلم سفاح التجمع بطولة النجم أحمد الفيشاوي ، مشيرا إلى أن حذفها أخلى بسلاسة القصة وأدى إلى حدوث فجوة في استيعاب الجمهور لقصة العمل .
وقال المؤلف محمد صلاح العزب خلال ندوته في " نيوز رووم ": المشاهد التي حذفت من الفيلم متنوعة وأنا مش شايف أي مبرر ليها إنها تتشال لأن اللي اتحذف مشاهد مثل العنف المنزلي .. أبو السفاح بيضرب أمه بشكل احنا بنشوفه في كل مسلسلات رمضان عادي .
وأضاف : بجانب حاجات كتير من طفولة السفاح اتحذفت اللي هي بتوضحلنا في الدراما هو ليه بقى سفاح؟!.. فبقى المشاهد بيتفرج ومش فاهم هو ليه بقى سفاح بسبب الفجوات اللي حصلت بعد الحذف .. فانا شايف إن لو الموضوع كان مشي بشكل سلس ومرن أكتر كان التلقي هيفرق بكتير .
سبب تحويل سفاح التجمع من مسلسل إلى فيلم
كشف المؤلف والمخرج محمد صلاح العزب عن أسباب تحويل سفاح التجمع من مسلسل مكون من 8 حلقات إلى فيلم سينمائي ، مشيرا إلى أن العمل كان من المفترض أن يكون من بطولة حسن الرداد قبل تحويل العمل إلى فيلم .
وقال محمد صلاح العزب خلال ندوته في " نيوز رووم " : أول لما أعلنا عن سفاح التجمع كان في 3 منتجين عايزين يعملوه بتصورات مختلفة للأبطال وبداية المشروع كان المفروض هيكون مسلسل من 8 حلقات بالتعاون مع صديقي أحمد السبكي وبطولة حسن الرداد .
وأضاف : اشتغلنا شوية على المشروع ولأسباب إنتاجية توقف المسلسل وبعد سنة كاملة فكرت وقولت هو ليه معملش سفاح التجمع فيلم فكلمت السبكي وقولتله وقالي يلا بينا وكلمت الفيشاوي وقولتله يلا نعمل سفاح التجمع فيلم وتحمس جدا واتفقنا على كل حاجة وبدأنا .
