أحمد عز في حواره مع "نيوز رووم" يكشف سر ابتعاده عن السوشيال ميديا

كشف الفنان أحمد عز، عن سبب ابتعاده عن منصات التواصل الاجتماعي، وعن رأيه فيما يتم تداوله رواد السوشيال ميديا.

وقال أحمد عز، في تصريحات خاصة لـ "نيوز رووم": "أنا عايز أعمل شريط سينما يعيش لي طول العمر، حتى لو هدفع من جيبي لأن هو ده اللي بيبقى لي، إنما أنا مش محتاج أثبت حاجة على السوشيال ميديا خالص".

وتابع أحمد عز، قائلًا: "مش محتاج أقول لحد أنا بعمل إيه أو بأكل إيه أو كويس ولا وحش أو أنا بعمل خير أو ما بعملش خير، دي حاجة ما بيني وبين ربنا".

وأضاف أحمد عز، قائلًا: "أنا اتعلمت كدة، أنا شفت الأستاذ محمود عبد العزيز بيعمل كدة وشفت أحمد زكي بيعمل كدة وشفت نجمنا الكبير الأستاذ عادل إمام مكنش بيطلع يقول أنا على السوشيال ميديا".

واستكمل أحمد عز، قائلًا: "أنا مش مع ده، ماليش دعوة باللي بيعمل كدة ما بعيبش هو كل واحد حر بيعمل إيه، بس أنا هدفي الأول وفي الآخر إن أنا أعمل فيلم حلو جداً أحلى من اللي فات وأروح أنام، مش عايز حاجة بعد كدة".

وأردف أحمد عز، قائلًا: "مش بتفق على كل اللي بيتكتب في السوشيال ميديا على فكرة يعني مؤخراً أنا ساعات بقيت بقرا حاجات ما يصحش لينا كمصريين إن إحنا نروح بالتفكير ده لأن أنت بتطلع ثقافة وفكر لناس وأجيال جديدة طالعة، بتقول لهم إيه؟".

واختتم أحمد عز، قائلًا: "ما يُقدم وما يُكتب ده خطر جدًا، لأن اللي بيملك المايك ده بيملك العالم، اللي بيملك الشاشة ده بيملك العالم، عشان كدة لازم ناخد بالنا كويس جدًا من اللي بيتعمل، وللأسف في ناس بتبقى نحب أو نكره، حب وأكره العمل، لكن الشخص ده أنت مش وصي عليا عشان تقيمني، أو أنا مش وصي عليك عشان أقيمك، لا خالص، أنا اللي ما بيني وما بينك شغل، أنت بتشوف الفيلم ما يعجبكش واكتب إنه ما بيعجبكش إنما من وجهة نظرك كفيلم إنما مش كبحبه أو بكرهه أو أنا مع فلان ضد فلان وبتاع، لأن الحاجات اللي أنا بشوفها الأيام دي بقيت بستصغرها أوي الحقيقة".

أحداث فيلم 7 Dogs

فيلم 7 Dogs، تدور أحداثه حول خالد العزازي، عميل الإنتربول، الذي يجد نفسه مضطرًا للتعاون مع غالي أبو داود، أحد أعضاء عصابة الكلاب السبعة، في مهمة مشتركة لمكافحة تجارة المخدرات، مما يضعهما في مواجهة سلسلة من الأزمات المعقدة.

أبطال فيلم 7 Dogs

فيلم 7 Dogs، بطولة الفنان أحمد عز، كريم عبدالعزيز، مونيكا بيلوتشي، هنا الزاهد، سلمان خان، ناصر القصبي، تارا عماد، بالإضافة إلى نخبة من ضيوف الشرف بينهم هالة صدقي وسيد رجب، تأليف تركي آل الشيخ، إخراج عادل العربي وبلال فلاح.