هبة الأباصيري تعليقا على احتفال زوج بزوجته لبلوغها المعاش: "أجمل أنواع السند"
وثق زوج لحظة مفاجأته لزوجته بـ "بوكية ورد" احتفالا بخروجها ببلوغها سن المعاش، بداية من خروجه من منزله حتى الوصول إلى مكتبها، ليقدمه لها بين أصدقائها في مكان عملها.
زوج يفاجئ زوجته لبلوغها سن المعاش
وقالت الإعلامية هبة الأباصيري، خلال تقديم برنامج «الستات ميعرفوش يكيدوا»، على قناة «سي بي سي»، "فيديو النهاردة لزوج بيفاجئ زوجته اللي طلعت على المعاش، متابعة: «أكتر حاجة لمست الناس في الفيديو ده مش الاحتفال في حد ذاته لكن الطريقة اللي الراجل الجميل ده بيبص لمراته بيها».
من أجمل أنواع السند الحقيقي
وواصلت الأباصيري: هذا الموقف أظهر أن كل تعب السنين والجري والمسؤولية عدوا كده هوا، كأنه النهاردة بيقولها شكرا وفكرة إن حد يفضل شايلك وبيقدرك وفرحان بيك بعد عشرة العمر الطويلة، دي من أجمل المعاني ومن أجمل أنواع السند الحقيقي اللي ممكن إنسان يرزق بيها.
بلوغ المعاش بداية جديدة
وأوضحت: يمكن موضوع المعاش بالنسبة لبعض الناس نهاية مرحلة ، لكن عند ناس تانية كتير بتشوفها بداية جديدة يعيشوا فيها مع بعض بهدوء وبحب أكتر وروقان أكتر الفيديو ده فكر الناس إن أبسط التفاصيل ممكن تبقى أغلى تعبير عن الحب زي ما شوفنا في الفيديو بالظبط.
جريمة في حق الإنسانية
في سياق منفصل، قد علقت الإعلامية هبة الأباصيري على مقطع الفيديو المتداول عبر مواقع التواصل الاجتماعي خلال الساعات الماضية، والذي ظهرت فيه سيدة تقوم بالاعتداء بالضرب على والدتها المسنة، التي تجاوز عمرها السبعين عاما، في أحد الشوارع.
وقالت هبة الأباصيري، خلال حلقة اليوم من برنامج «الستات ما يعرفوش يكدبوا» المذاع عبر شاشة سي بي سي: «قلبي على ولدي انفطر، وقلب ولدي عليا حجر.. مثل قديم لكنه بيتجسد قدام عنينا النهارده في واقعة البنت اللي ضربت أمها المسنة اللي يمكن عدت السبعين سنة لمجرد إن الأم عايزة تقعد قدام البيت والبنت عايزة تدخلها جوه، لكن مهما كان السبب، مفيش أي مبرر يسمح لإنسان يتجرد من كل معاني الرحمة والإنسانية ويمد إيده على أمه».
وأضافت: «اللي حصل ده مش مجرد خلاف أسري، ولا لحظة عصبية، ولا ساعة شيطان وعدت، اللي حصل جريمة في حق الإنسانية، ومش بتحصل حتى في الغابة وسط الحيوانات، وده قهر عظيم لأم ضعيفة ومسنة اتضربت واتهانت من بنتها».
وتابعت الأباصيري: «الأوجع من الضرب والإهانة إن الأم رغم كل اللي حصل، وقفت تدافع عن بنتها وبتطلب من الناس يسامحوها، وده قهر فوق القهر».
بر الوالدين أمر إلهي
وأكدت أن بر الوالدين أمر إلهي في جميع الأديان والشرائع السماوية، قائلة: «ربنا أمرنا في كل الكتب السماوية ببر الوالدين، وده مش اختيار ولا حسب المزاج، ده أمر واجب التنفيذ، متابعة، "حقك على راسي يا أمي، ولو البنت دي بس تعرف قد إيه في ناس كتير بيتمنوا لحظة واحدة يرجعوا فيها أمهاتهم للحياة علشان يقعدوا تحت رجليهم، كانت هتعرف قيمة النعمة اللي هي فيها».
