صراع الدوري يشتعل.. ناقد رياضي يكشف 5 سناريوهات تحدد البطل الليلة
علق الدكتور عثمان إبراهيم الناقد الرياضي، على إقامة المباريات الحاسمة للفرق الثلاثة في توقيت واحد بـ الدوري اللية، قائلا: «طبيعي جدا يكون 3 ماتشات في نفس التوقيت لتطبيق مبدأ تكافؤ الفرص، لكن الفكرة كلها في الضغط النفسي والعصبي، لأن الماتشات في نفس الوقت ده ربما يكون ضغطه أقل من إن إنت تخش المباراة وإنت مثلا مطالب بالفوز، فانت هتبقى تحت ضغط أكبر كده كده، والثلاث فرق مطالبين بالفوز».
إقامة المباريات في توقيت واحد
وأضاف عثمان، خلال مداخلة هاتفية عبر قناة «إكسترا نيوز»: «يمكن الزمالك شوية لو عنده فرصة التعادل مدياله برضه أريحية إن هو أوبشن تاني أو خيار تاني يقدر من خلاله إن هو يفوز بلقب الدوري، فيمكن الضغوط أقل قليلا عن نادي الزمالك بالمقارنة ببيراميدز والنادي الأهلي وفقا لـ ترتيب 53 الزمالك، 51 بيراميدز، 50 النادي الأهلي».
الزمالك يمتلك فرصتين للتتويج
وتابع: « في خمس سيناريوهات اتنين منهم لصالح الزمالك واتنين لصالح الأهلي وواحد لصالح بيراميدز،الأهلي أقل فريق في النقاط والزمالك أعلى فريق في النقاط محتاج يتعادل يفوز بالدوري أو يفوز يفوز بالدوري، يعني عنده خيارين أو سيناريوهين يمنحوه لقب الدوري.
نادي بيراميدز عنده سيناريو واحد
وواصلك «نادي بيراميدز عنده سيناريو واحد بس إنه يفوز على سموحة وإن الزمالك يخسر من سيراميكا، معندوش أي احتمالات أخرى، ده السيناريو الوحيد اللي يخلي بيراميدز يتوج بالدوري لأول مرة في تاريخه، لكن الزمالك بيدور على لقب رقم 15 وبيراميدز بيدور على اللقب الأول والأهلي بيدور على اللقب رقم 46 بعد طبعا لقب 45 بتاع السنة اللي فاتت، وكان فيه جدل كبير جدا جدا.
السر وراء فوز الأهلي
واختتم: «الأهلي عنده سيناريوهين السيناريو الأول إنه طبعا يفوز على المصري، ده مفيش فيه خلاف، وإن الزمالك يخسر من سيراميكا، وبيراميدز يتعادل مع سموحة، السيناريو الثاني إن الأهلي يفوز والزمالك يخسر من سيراميكا وبيراميدز يخسر من سموحة، بالتالي الأهلي محتاج بيراميدز ميكسبش والزمالك يخسر وإنه هو يفوز على المصري، ده السيناريو اللي هيؤدي إن الأهلي يفوز باللقب لو حصل».
