بين اللعب على الهادي وزعيق «مازو».. كيف صنع هشام ماجد ستايل كوميدي مختلف في «اللعبة»؟

تحدث الفنان هشام ماجد عن كواليس واحد من أنجح الأعمال الكوميدية في السنوات الأخيرة، مسلسل «اللعبة»، موضحا فلسفته في الضحك وكيف استطاع الموازنة بين شخصيته الحقيقية وشخصية مازو المندفعة.

تحول هشام ماجد في اللعبة

وخلال لقائه ببرنامج «صاحبة السعادة» المذاع على قناة «dmc» مع الإعلامية إسعاد يونس، قال هشام: «لما عملت مسلسل اللعبة كان على العالي، يعني كان كله هزار وحماس وشخص سخن طول الوقت وبيزعق، فهو الستايل ده كان لايق عليا».

سنة كاملة من الكتابة

وعن سر الاستمرارية والنجاح الذي لا يمل منه الجمهور، كشف هشام ماجد أن العمل ليس وليد الصدفة، بل هو نتاج تعب ومجهود شاق في الكتابة: «كتابة اللعبة يعني ممكن تاخد لها سنة، وهما أصلا ورشة اللي ماسكها فادي أبو السعود، وفيه والي وخطاب وإبراهيم صابر هم اللي بيكتبوا.. وطول الوقت اجتماعات أنا وشيكو ومعتز والمؤلفين، يكتبوا حلقتين ونقعد نعدل فيها، فهي طول الوقت فيها ورشة».

كاست اللعبة.. عائلة بديلة

وتحدث هشام عن العلاقة التي تربطه بأبطال العمل مثل شيكو وأحمد فتحي ومي كساب وميرنا جميل، مؤكدا أنهم تخطوا مرحلة الزمالة: «مع الوقت إحنا خلاص بقى كل واحد عارف أسلوب اللي قدامه، أنا عارف أحمد فتحي بيضحك إزاي وعارف مي بتضحك إزاي وشيكو عارف إزاي.. خلاص كلنا بقينا أصل اللعبة دي يعني إحنا تلقائي قعدت معاهم أكتر من عيلتي»، مضيفا: «الموضوع اتحول إن هو بقى بجد هم عيلتك، حتى الفترة اللي مابنصورهاش فيها وبنرجع، بنحس كأننا إنت مسافر مهاجر ورجعت لأنك وسط عيلتك».

وفي سياق آخر، تحدث الفنان هشام ماجد عن الفنان الراحل هشام سليم، مؤكدا أنه كان من أكثر الفنانين الذين تأثر بهم فنيا وإنسانيا، وأنه كان السبب الرئيسي في حبه لفكرة التمثيل منذ طفولته.

حلمي وأنا صغير أكون زي هشام سليم

وقال الفنان هشام ماجد، خلال لقائه ببرنامج «صاحبة السعادة» مع الإعلامية إسعاد يونس، إن هشام سليم كان بالنسبة له نموذجا مختلفا، موضحا: «أنا لما كنت صغير وبتفرج عليه كان نفسي أمثل وأكون زي هشام سليم».