محمد رمضان يكشف سبب ابتعاده عن الدراما آخر 3 سنوات
كشف الفنان محمد رمضان عن سبب ابتعاده عن الدراما خلال آخر 3 سنوات، قائلا: «أنا وقت بعد “جعفر العمدة” خفت جدا، كان سني 35 سنة، وحاسس إزاي عندي في مكتبتي 8 مسلسلات بطولتي، وأنا دايما النموذج بتاعي الأساتذة العظام، أستاذ عادل إمام وأستاذ نور الشريف وأستاذ أحمد زكي».
قدوتي عادل إمام وأحمد زكي
وتابع: «كنت بشوف مثلا أستاذ عادل إمام لحد سن معين كان عامل 5 أو 6 أفلام في السنة، لكن كان عنده مسلسلين فقط، وأستاذ أحمد زكي في مسيرته كلها مفيش… “هو وهي” و“الأيام”».
وأضاف: «فقلت 8 مسلسلات حاسس إن الجرعة دي زيادة، يعني مفيش توازن.. هي حلوة آه، بس كترها ممكن على المدى البعيد يأثر».
مسلسل جعفر العمدة
واستكمل: «وأنا بعمل “جعفر العمدة” وكان فيه شعر أبيض وشخصية عندها 50 سنة، طيب لما أبقى أنا عندي 50 سنة هعمل إيه؟ حاسس إني باخد من المستقبل وبعمل دلوقتي».
وأوضح: «قلت طيب ما ناخد وقتنا في الفيلم، عايز أعمل فيلم فعلا يليق بالجمهور الكبير اللي صنعنا بعد ربنا.. وطول الوقت كنت حاسس إني بخلص المسلسل مجهد، فبعمل فيلم في وقت قصير».
انت اسمك أكبر من أفلامك
وأضاف: «صديق ليا، من غير ما أذكر اسمه، قال لي جملة: إن اسمك أكبر من أفلامك.. قلت له يعني إيه؟ قال لي يعني لما بنقول محمد رمضان، الناس مستنية أفلام كبيرة، فالجملة دي وقفتني».
وتابع: «قلت آه، يبقى أنا محتاج أضحي بجزء عشان أصنع فيلم كويس.. أنا هوقف عن الدراما شوية وأركز بس في الفيلم ده، ويبقى الفيلم ده كاستادي للأفلام اللي جاية، ويبقى أي منتج جاي أقول له إن فيلمي بصناعة الكبار دول».
