مروة صبري ترد على الشائعات حول موت إيناس النجار:"كانت هتتجوز بعد رمضان"

بدأت الإعلامية مروة صبري الموسم الجديد من برنامجها قعدة ستات بالحديث عن حقيقة ما قيل بشأن وفاة الفنانة إيناس النجار.

وفاة إيناس النجار

حيث قالت إيناس النجار: “إيناس كانت منوراني في قعدة ستات تقريبًا من حوالي أقل من سنة .. وكانت بتتكلم من قلبها .. وعن الوجع اللي بنحسه لما شخص قريب بيموت وقت ما كانت بتتكلم عن وفاة بابها .. اتفاجئنا في رمضان لما سوار قالت أن عندها تسمم في الدم .. وكلمتها وقالتلي أنا يومين وهخرج انا جيت المستشفي وقالوا أن المرارة أنفجرت وأن عندي تسمم في الدم .. بعدها بكام يوم سوار كتبت أدعولها عشان إيناس دخلت في غيبوبة .. ولما كلمت سوار كانت في حالة انهيار عصبي رهيب .. بعدها بيومين لاقيت سوار كتبت خبر وفاة إيناس ويمكن أنا أكتر واحدة اتضايقت واتصدمت عشان كنت بتابع حالتها مع سوار .. وكان كلي أمل أنها تكون كويسة”.

مروة صبري ترد على شائعة العلاقة التوكسيك

واستكملت مروة صبري قائلة: “بس المحزن والمفجع أكتر أن الناس تطلع ترند على حساب واحدة ميتة .. هي دي النقطة اللي عايزة أتوقف عندها .. وبحكي الحكاية دي كلها عشان أوصلها .. بعض الإعلاميين اللي ليهم مصداقية كبيرة بدون ذكر أسامي بدأوا يكتبوا بوستات عشان يطلعوا ترند على حساب واحدة ست ماتت وهي عند ربنا دلوقتي .. واتقال أن إيناس ماتت مش من التسمم في الدم ده من التسمم في الحياة وأنها كانت عايشة علاقة توكسيك .. مع واحد بتحبه بقالها 7 سنين وهو اللي عمل فيها كده .. حافظي على نفسك وأبعدي عن الرجال التوكسيك اللي هتموتك قبل أوانك .. أولًا الأعمار بيد الله محدش بيموت قبل أوانه .. والعلاقة التوكسيك ممكن تكئب مش تموت .. وأصلحلكم كل ده بقى .. أن أساسًا مكنش في علاقة توكسيك .. الكلام ده على لسان أختها سوار أنا طلبت منها تعمل مداخلة ولكنها في حالة نفسية سيئة جدًا ووأنا بعزيها هي اللي قالتلي أطلع اتكلم واقول ده عن لسانها .. إيناس النجار مكنتش في علاقة توكسيك .. إيناس كانت بتحب راجل محترم .. وكانت هتتجوز بعد رمضان .. بيتها كان جاهز .. وحفاظًا على أن أختها مش حابة تقول هو مين ولا تقول اسمه أنا بردو مش هقول اسمه”.