تجربة سينمائية عالمية بنكهة عربية.. إياد نصار يكشف كواليس "المشروع إكس"
كشف الفنان إياد نصار، في تصريح له عن دوره في الفيلم العالمي "المشروع إكس"، الذي تم الانتهاء من تصويره مؤخرًا، تمهيدًا لعرضه ومشاركته في موسم عيد الأضحى القادم.
فكرة "المشروع إكس"
وقال إياد نصار عن فيلم "المشروع إكس": “هو فيلم عالمي .. المشروع بصريًا جديد .. في مناطق جديدة وحاجات جديدة .. اتنفذ بطريقة تقارب الشغل العالمي .. عشان أنا اشتغلت في مشاريع عالمية فعارف ازاي تحضيراتهم والكواليس بتاعتهم .. إحنا في مشروع إكس شغالين بنفس الطريقة. صورنا في روما .. قفلنا شوارع في روما عشان نصور.. أوقات أعمال السينما لما بنصورها برا مصر بنسرق شوتات كده على طول".
وتابع:" لكن هنا كنا براحتنا في التصوير.. ومطاردات وأكشن وتحت المياه مشروع مهم جدًا.. وأنا بحب الشغل مع بيتر ميمي.. هو بيثق فيا وأنا بثق فيه جدًا.. ومع كريم عبد العزيز ده الشغل متعة معاه.. من ساعة ما ابتدينا في الفيل الأزرق والاختيار ونتقابل تاني في المشروع إكس .. وإن شاء الله الفيلم يحقق نجاح كبير".
أبطال الفيلم
وكشف إياد نصار عن كواليس تعامله مع بيتر ميمي، و أبطال العمل، بعد مشاركتهم في فيلم "المشروع إكس"، وقال: “بيتر ميمي، إحنا اشتغلنا مع بعض كتير يمكن الحاجة الوحيدة اللي مشاركتش فيها معاه كان مسلسل الحشاشين، عشان كنت بصور صلة رحم.. شغلنا دايمًا مع بعض وأنا بفرح بالشغل معاه .. كريم عبد العزيز نشأت صداقتنا سوا من فيلم الفيل الأزرق.. عشان بينا أصدقاء مشتركين وكان دايمًا بيوصلني كلام من كريم أنه معجب بأعمالي على لسانهم.. لغاية ما اتقابلنا وبقينا أصدقاء".
وأضاف:"أنا وكريم عبد العزيز شبه بعض في حاجة.. وهي أننا في حالنا أوي مش منتشرين.. هو ممثل مخلص جدًا ونجم ليدر للمشروع بشكل حقيقي.. ياسمين صبري حبيتها في الشغل بسيطة.. هي مختلفة وحبيت بساطتها في الشغل.. في عندها فهم خاص للحياة مكنتش واخد بالي منه قبل ما اتعامل معاها في الفيلم.. أحمد غزي بيحضر نفسه أنه يكون حاجة كبيرة.. وانبسطت جدًا بنجاح شغله في قهوة المحطة.. عصام السقا شخصية بسيطة جدًا وعجبني الشغل معاه".
