سحر رامي: حسين الإمام خدعني بشغل علشان يتجوزني.. وقررت مزعلش تاني بعد وفاته

قالت الفنانة سحر رامي: «أنا لما اتعرض عليا دوري في مسلسل اتنين غيرنا وروحت قابلت المؤلفة رنا أبو الريش والمخرج وليد الحلفاوي أول حاجة سألتها ليه اختارتوني أنا.. يعني أنا توقعت يجيلي أدوار أم بعد 2015 لأني قدمت دور أم وظهر جدا.. لكن الدور ده جه بعد فترة طويلة».

وأضافت، خلال استضافتها في برنامج «الستات» المذاع عبر شاشة النهار: «رنا قالتلي إنها شافتي في برنامج ومن طريقة كلامي شافت إن الدور لايق عليا وعلشان كدا اختارتني.. وأنا سعيدة جدا بردود أفعال الجمهور على الدور ومكنتش أعرف إن الجمهور اشتاق ليا كده».

وأكدت أن دورها في مسلسل اتنين غيرنا يشبة شخصيتها الحقيقة، لافتة إلى أنها سعيدة بالحفاوة التي استقبلوها بها فريق العمل منذ أول أيام العمل.

وأردفت سحر رامي: «أنا أصلا اتاأخروا عليا في امضاء العقد.. وكلمت رنا أبو الريش قولتلها لسا عايزني ولا لا، وده لأن الموقف ده حص معايا كتير بروح واتفق وأمضي ساعات واخد عربون وفي الأخر الأقي العمل شغال منغيري.. حقيقي مش عارفة ليه ممكن حد يعمل كده، لكن أنا عمري ما دورت ورا السبب علشان مزعلش.. أنا بعد حسين قررت إني مش هزعل أنا أخدت نصيبي في الزعل.. بالرغم من إن إحنا كنا بنختلف كتير ونتخانق لكن ده اللي خلانا كملنا لأن كل واحد كان بيحترم التاني وكنا كيان واحد ومندمجين فكريا وأنا كنت مبهورة بيه جدا».

وكشفت عن موقف تعارفهم ببعض، قائلة: «اتعرفنا على بعض في موقف إنه بعتلي أورودر رقص لأني كنت برقص بالية وروحتله في استوديو الأهرام ووقتها مكنتش اعرفه خالص.. وبدأنا نتقابل ومضيت عقد وأخدت عربون وفي الأخر طلع كان بيرسم عليا وعايز يتجوزني وكانت كل دي حجج لكني فهمت ده بعد كتير».

وتابعت سحر رامي: «وبعد فترة قالي أنا أول ما شوفتك كنت عايز اتجوزك وكل الشغل ده مش بجد دي حجة علشان أتجوزك.. وبعدين معمليش الشريط اللي اتفق معايا عليه أصلا.. وحبينا بعض جدا جدا  وقربنا من بعض وكنا متفاهمين واتجوزنا».