منة فضالي تخرج عن صمتها: "حسبي الله ونعم الوكيل في أي حد يسمم حيوان"
أعادت الفنانة منة فضالي نشر منشور عن شخص قام بتسميم مجموعة من الكلاب، وذلك من خلال حسابها الرسمي على موقع التواصل الإجتماعي فيسبوك، حيث قالت منة فضالي: “حسبي الله ونعم الوكيل في كل ظالم ومفتري، أي حد يسمم حيوان ربنا خلقه، دي روح منكم لله، ربنا ينتقم منكم”.
منة فضالي تتهم خادمتها بالسرقة
في سياق آخر، قد كشفت الفنانة منة فضالي، أسرار خادمتها الأجنبية التي تتهمها بسرقتها، وذلك عبر حسابها الشخصي على فيسبوك، حيث أكدت أنها سرقت العديد من الأشياء الثمينة من منزلها ومتعلقاتها الشخصية، رغم عملها معها لمدة عام وشهرين ومعاملتها لها بشكل جيد.
وكتبت منة فضالي : "البنت دي بقالها عندي سنة وشهرين ومش معاها باسبور، وقولتلها هاتي باسبور أعملك إقامة، قالتلي محتاجه يومين إجازة، طلبت المكتب يجي ياخدها على أساس إنها هتروح تجبلي باسبورها، وإدتها تليفون علشان معهاش تليفون علشان أعرف أكلمها، أول حاجة محبتش حد يعرف عنوانها وخليت المكتب يوصلها في مكان بعيد".
وواصلت : "وواحدة جت أخدتها منهم وبعدين التليفون اتقفل وعملت بلوك ليا ولأمي، واكتشفنا بعدها إنها سارقة كل حاجة من البيت عن طريق أكياس القمامة السودة، وهي خارجة من عندنا كان معاها شنطتها الصغيرة، بعد كده لقناها واخدة حلق وخاتم أمي الذهب وسلسلة ذهب كبيرة، وسارقة هدوم كتير من عندي وشنط غالية 3 ساعات، كلمت المكتب وهما حاولوا يوصلولها، راحت مخليه واحدة تزعق معاهم، وعملت للمكتب بلوك".
وتابعت منة : "ودي صورها ببعض الحاجات اللي سرقتها من عندي، والست دي هي المسؤولة عنها، حاولت أتواصل معاها قفلت في وشي وعملت بلوك، روحت القسم وعملت محضر بالمسروقات، وأدتهم رقم باسبورها وإن شاء الله يعرفوا يجيبوها".
وأضافت منة فضالي : "المشكلة الأساسية إني عرفت بعد كده، إن البنت دي بتشتغل مع حد في نيجيريا بتاع مخدرات، وإنها متصابة كذا مرة بالرصاص".
منة فضالي تستاء مما يحدث
كما قالت فضالي : "مش عارفة إزاي الناس دي بتدخل البلد، اللي زي دول لازم نحرص منهم، للأسف أنا عملت خير معاها أوي ربنا اللي يعلم، والناس كلها اللي جاتلي بيتي شافت أنا كنت بتعامل معاها إزاي، بس اكتشفت إن دول معندهمش ضمير وكدابين وطبعهم الخيانة".
وأكملت :"هتقولولي وإيه اللي يخليكي تشغلي واحدة أجنبية، أقولكم لأن جربت مصريين كتير ومنهم اللي اتهجمت على أمي وهي لواحدها وأنا كنت في التصوير، وفي اللي كانت أخلاقها مش حلوة، وفي اللي كانت بتصوني وأنا قاعدة وتبعت لناس صوري، فا قولت خليني أجيب حد لا يعرفني ولا يعرف لغتنا، ويمكن يكونوا أحسن، مع إن في مصريات كتير كويسين بس مش بيرضو يباتوا وأنا لازم حد يكون مع أمي طول ما أنا في الشغل لان مقدرش أسبها لوحدها".
واختتمت منة فضالي : " أنا بنزل الكلام ده وربنا يعلم أنا كنت بحب البنت دي قد إيه، لكن اكتشفت حقيقي اتقي شر من أحسنت إليه ، لو حد بيتعامل مع الست دي خلي بالكم ، وإن شاء الله القانون هيجبلي حقي، منها لله".
