الحمد لله على حب الناس.. نجل سليمان عيد يؤكد على رد تكاليف خارجة والده لمحبيه

بعد تكفل محبيه بدفع كل تكاليف خارجته، تقدم عبدالرحمن سليمان نجل الفنان الراحل سليمان عيد بالشكر لكل من ساهم بشئ، ومؤكدًا رغبته في رد تلك التكاليف.

وكتب عبدالرحمن عبر حسابه الشخصي بموقع التواصل الإجتماعي فيسبوك: "شكر الله سعيكم جميعا، ملتمسين العذر لكل اللي مقدرش ييجي العزا، و مقدرين ظروف كل اللي كان نفسه ييجي، ربنا يجعله في ميزان حسناتكم و يغفر لأبويا ويرحمه، شكرًا لكل اللي طبطب على قلوبنا أنا وأمي وأختي".

وتابع: "شكرًا من قلبي بجد لأخواتي وأصحابي وأساتذتي اللي وقفوا جمبي من أول لحظة ومسابونيش أبدًا لحد دلوقتي ربنا يخليكم ليا ويباركلكم في حياتكم ويديم المحبة بيننا يارب، بحبكم أوي والله وكل واحد فيكم عارف هو عندي ايه". 

وأضاف: "سامحوني في ناس كتير أوي أوي بجد باعتينلي وأنا مش عارف أرد على العدد ده ومحدش يزعل إني مقدرتش أرد بس والله تسلم إيديكم وعظم الله أجركم جميعًا والحمد لله على حب الناس".

واختتم مؤكدا: "اخر وأهم حاجه ورحمة أبويا الغالي كل من دفع جنيه أنا معرفش عنه حاجه في خارجة أبويا لحد إنهارده يبلغني بيه عشان يكون مرتاح ومطمن ولو في حد له عندي أوعند أبويا أي حاجه أرجوكم يعرفني ضروري، اللهم ارحم موتانا وموتى المسلمين جميعا".

وقد شارك عبد الرحمن نجل الفنان الراحل سليمان عيد، متابعيه بفيديو بتاريخ 5 أبريل الجاري، عبر صفحته الشخصية على موقع التواصل الاجتماعي "فيس بوك"، وظهر الفنان الراحل سليمان عيد في الفيديو وهو يرقص مع أهل النوبة. 

رحلة سليمان عيد 

وعلق عبد الرحمن على الفيديو قائلًا: "الفيديو بتاريخ 5 أبريل 2025 أسوان (غرب سهيل) النوبة أبويا اختار الرحلة دي مخصوص عشان يروح لأهل النوبة ويصالحهم لو حد زعل منه وفعلًا روحنا ولف على الناس كلها في غرب سهيل، واتأكد إنهم مش زعلانين منه، وغنى معاهم ورقص وفرح معاهم وارتاح قلبه حبيبي، ادعوله حبيبي عريس في الجنة مع حبايبه".

جنازة سليمان عيد 

ويذكر أن جثمان الفنان الراحل سيلمان عيد، شيع يوم الجمعة الماضية من المسجد الكبير بالمجمع الإسلامي في الشيخ زايد، في جنازة مهيبة حضرها عدد كبير من نجوم الوسط الفني، الذين حرصوا على وداع زميلهم في لحظاته الأخيرة.

 وسادت أجواء من الحزن الشديد خلال مراسم التشييع، وسط مشاهد مؤثرة، كان أبرزها انهيار الفنانين صلاح عبدالله، أحمد السقا، وحمدي الميرغني، وبيومي فؤاد الذين لم يتمالكوا دموعهم تأثرًا برحيل صديقهم المقرب.